Ռուսաստանի և ԱՄՆ նախագահները սատարում են Քոֆի Անանի առաքելությանը և Սիրիայի հակամարտության խաղաղ կարգավորման հույս են հայտնում: Այս մասին ասվում է ՌԴ և ԱՄՆ նախագահներ Դմիտրի Մեդվեդևի և Բարաք Օբամայի համատեղ հայտարարության մեջ:
«Մենք քննարկել ենք նաև միջազգային համագործակցության հարցերը, խոսել որոշ առավել խնդրահարույց հարցերի, ներառյալ Սիրիայի շուրջ: Երեկ ես հանդիպել եմ ՄԱԿ-ի գլխավոր քարտուղարի բանագնաց պարոն Անանի հետ, մենք Միացյալ Նահանգների նախագահի հետ ելնում ենք այն բանից, որ դա լավ միջոց է հասնելու խաղաղության թեկուզ առաջին կետին և շարունակել ճանապարհը ներկա պահին Սիրիայում գործող տարբեր հասարակական ուժերի միջև կապ հաստատելու համար»,- ասել է Մեդվեդևը, որի խոսքերը մեջբերում է RIA Novosti-ն:
Նա ավելացրել է, որ Մոսկվան և Վաշինգտոնը պատրաստ են Անանին ցուցաբերել բազմակողմանի աջակցություն:
Իր հերթին ԱՄՆ նախագահ Բարաք Օբաման հայտարարել է, որ չնայած Սիրիայի իրադարձություններին տրվող տարբեր գնահատականներին՝ Մոսկվան և Վաշինգտոնը աջակցում են Անանի առաքելությանը:
«Չնայած այն բանին, որ հատկապես վերջին ամիսներին որոշակի դժվարություններն կան այդ խնդրին մեր մոտեցումների հետ կապված, մենք համաձայնության ենք եկել, որ պետք է աջակցենք Քոֆի Անանի առաքելությանը, որը փորձում է վերջ դնել Սիրիայի արյունահեղությանը և առաջ շարժվել՝ ստեղծելու այնպիսի մեխանիզմ, որը հնարավորություն կտա սիրիացի ժողովրդին ունենալ իրական լեգիտիմ ներկայացուցիչներ, ունենալ լեգիտիմ կառավարություն»,- ասել է Օբաման:
Ռուսաստանի նախագահը նաև նշել է, որ անհրաժեշտ է գործել այնպես, որպեզի մեծ խնդիրներ չստեղծեն, և փորձեն անել այնպես, որպեսզի Սիրիայում քաղաքացիական պատերազմի վտանգը իրականություն չդառնա, իսկ Անանի առաքելությունն ավարտվի լիարժեք երկխոսության զարգացմամբ:
Հանդիպմանը քննարկվել է նաև Մերձավոր Արևելքում տիրող ընդհանուր իրավիճակը, Իրանի միջուկային ծրագիրը և Աֆղանստանում տիրող իրադրությունը:
