Ինչպես հաղորդում է ВВС-ն, Սքոթլանդ Յարդը ռուս բանկիր Գերման Գորբունցովի նկատմամբ մահափորձից մի քանի օր անց հաստատել է տուժողի ինքնությունը:
Ինչպես նշում է Independent թերթը, բանկիրի հարևաններից մեկը` 54-ամյա Ջոնը, հղում կատարելով ոստիկանությանը, հայտարարել է, որ Գորբունցովը ծանոթ էր իրեն կրակողի հետ:
Նշենք, որ ավելի վաղ հաղորդվում էր, որ Գորբունցովը դեպքի ժամանակ 20 տարեկան շիկահեր աղջկա հետ է եղել:
Բանկիրի կինը` 46-ամյա Լարիսա Գորբունցովան, Լոնդոն է եկել դեպքից մեկ օր անց:
Росбалт-ի հաղորդած տեղեկությունների համաձայն՝ մարտի 20-ին, տեղական ժամանակով ժամը 19:50-ին, իր շենքի մուտքի մոտ Գորբունցովի վրա կրակ են բացել: Տուժածին հասցրել են հիվանդանոց, որտեղ նրան արհեստական կոմայի մեջ են գցել:
Տուժածի իրավապաշտպանի կարծիքով՝ մահափորձը կարող էր կապված լինել այն դիմումի հետ, որը նրա պաշտպանյալը հանձնել էր ոստիկանությանը: Դրանում Գորբունցովը հայտնում էր, որ վկա է եղել «Կոնվերս-գրուպ» ընկերության համասեփականատեր Ալեքսանդր Անտոնովի նկատմամբ մահափորձ կազմակերպելու խոսակցություններին: Նրա վրա կրակել են հենց այն նույն մարդիկ, ովքեր սպանել էին Պետդումայի նախկին պատգամավոր Ռուսլան Յամադաևին:
Այս մասին հաստատել են նաև ոստիկանությունում:
«Իրոք, Գորբունցովի հայտարարությունից հետո Անտոնովի նկատմամբ մահափորձի և Յամադաևի սպանության գործերը կրկին սկսվել են քննվել»,- նշել է աղբյուրը:
«Հայտնում եմ Ձեզ, որ ինձ հայտնի են Ալեքսանդր Անտոնովի նկատմամբ մահափորձի նախապատրաստման և իրականացման մանրամասները: Այդ ընթացքում ես ապրում էի Մոսկվայում: Այդ ժամանակ իմ գործընկերն էր Պյոտոր Չուվիլինը, որը Սերգեյ Մենդելեևի հետ միասին մշակել և իրականացրել է Ալեքսանդր Անտոնովի մահափորձը»,- ասվում է նրա դիմումի մեջ:
