Ռուսաստանի նախագահ Դմիտրի Մեդվեդևը կոչ է արել ՆԱՏՕ-ին համագործակցել Հավաքական անվտանգության պայմանագրի կազմակերպության հետ, որն իր մեջ ներառում է նախկին ԽՍՀՄ մի շարք երկրներ:
«Մեր դաշնակիցների հետ սերտ համակարգմամբ մենք հետևողականորեն ամրապնդում ենք համագործակցությունը Հավաքական անվտանգության մասին պայմանագրի կազմակերպության շրջանակներում, ընդ որում՝ այդ պայմանագիրը դիտում ենք որպես ոչ թե մեկուսացնող, այլ արդյունավետ տարածաշրջանային մեխանիզմ՝ մեր ընդհանուր սպառնալիքներին դիմադրելու համար»,- ասել է Մեդվեդևը Մոսկվայում եվրատլանտյան անվտանգության շուրջ միջազգային համաժողովում:
«Ի դեպ, Հյուսիսատլանտյան դաշինքի մեր գործընկերները լավ կանեին մտածեին ընդլայնված կամ արդյունավետ հարաբերություններ ստեղծելու, ՀԱՊԿ-ի հետ կապեր հաստատելու վերաբերյալ: Ինձ թվում է՝ դա պարզապես հասունացել է, դա պարզապես փոխադարձ շահերից է բխում»,- Մեդվեդևի խոսքերը մեջբերում է RIA Novosti-ն:
ՀԱՊԿ-ի մեջ են մտնում Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանը և Ուզբեկստանը:
