Օրերս մոսկովյան երկու «օրենքով գողերի»` 48- ամյա Կամո Եղիազարյանի և 24-ամյա Սերգեյ Ասատրյանի հարաբերություններում, ում միջև վաղուց արդեն կար որոշակի լարվածություն, տեղի է ունեցել անակնկալ շրջադարձ: Ինչպես հաղորդում է Primecrime կայքը, որոշ տեղեկությունների համաձայն` Սերգեյը մեղադրել է Կամոյին «օբշյակի» փողերի ոչ նպատակային ծախսելու մեջ և դադարեցրել է նրա իրավասությունները: Մի շարք «գողեր», տեղեկանալով մանրամասնությունների մասին, կողմ են եղել «Օսետրինայի» որոշմանը: Հունվարի յոթին Սերգեյ Ասատրյանը զանգել է Կամոյին, ով այժմ գտնվում է Մոսկվայի թիվ 3 ՔԿՀ-ում, և պահանջել է բացատրություն, թե ինչի վրա են ծախսվել այն ֆինանսական միջոցները, որոնք վերցվել էին ընդհանուր «գանձարկղից»: Ասում են, որ սկզբում Կամոն հերքել է «փոխառության» մասին տեղեկությունը, սակայն չբավարարվելով պատասխանով` Սերգեյն իրենց երկխոսությանը հեռախոսային կոնֆերանս-կապի միջոցով միացրել է երկու այլ «գողերի»` Վիտալի Ավդիյանին և Սուլիկո Շարիկաձեին: Հասկանալով, որ հետագա հերքումը միայն ավելի կխորացնի իր մեղավորությունը, Կամոն ընդունել է, որ սխալ է թույլ տվել և սկսել է ներում հայցել Սերգեյից, սակայն վերջինիս կողմից որևէ մեծահոգության մասին խոսք անգամ լինել չէր կարող: Սերգեյն իր խոսակցին ասել է, որ այդ պահից սկսած` նա այլևս «գող» չէ: Դրանից հետո ՔԿՀ-ի «նայողին» տրվում են համապատասխան հրահանգներ:
Հիշեցնենք, որ անցած տարվա օգոստոսին Ասատրյանը և Եղիազարյանը հայտնվել էին հարևան խցերում: Այդ ժամանակվանից սկսած` Կամոյի և Սերգեյի հարաբերություններում որոշակի լարվածություն է ի հայտ գալիս, որի զարգացումն արգելում է Վասյա Բանդիտը` ավագի իրավունքով: Մեկ ամիս անց Ասատրյան կրտսերն ազատվում է, իսկ Վասյա Բանդիտը տեղափոխվում է այլ ՔԿՀ: Պրեսնում մնալով միակ «գողը»` Կամոն սկսում է ֆինանսական ընդհանուր միջոցները ծախսել թմրադեղերի վրա, և հաշված օրերի ընթացքում ծախսվում է 160 հազար ռուբլի: Սակայն նախապես պայմանավորված ժամանակին Կամոն չի կարողանում վերադարձնել փողը, ինչից էլ ծագում է «Օսետրինայի» առաջ քաշած ողջ խոսակցությունը: Առայժմ բավականին անորոշ է Կամոյի հետագա ճակատագիրը, քանի որ կորցնելով տիտղոսը` նա ստիպված է լինելու սովորական դատապարտյալի պես անցկացնել մնացած պատժաչափը:
