Իտալիայի ոստիկանությունն այսօր առավոտյան ձերբակալել է երիտասարդ մարոկկացու՝ ահաբեկիչներ պատրաստելու, մասնավորապես զենք և պայթուցիկ նյութեր գործադրել սովորեցնելու կասկածանքով: Այս մասին հաղորդում է RIA Novosti-ն՝ վկայկաչելով իտալական ԶԼՄ-ները:
Իրավապահ մարմինների տվյալներով՝ ծնունդով մարոկկացի 20-ամյա երիտասարդը 6 տարի ապրել է Իտալիայի հյուսիսում՝ Բրեշիա մարզում: Նա ձերբակալվել է ահաբեկչության դեմ պայքարի կենտրոնական ծառայության հատուկ գործողությունների արդյունքում:
Ոստիկանության հաղորդագրության մեջ նշվում է, որ մարոկկացու ինքնությունը պարզվել է ջիհադի վերաբերյալ թեմաներ քննարկող բազմաթիվ ինտերնետ կայքերի մշտական մոնիտորինգի շնորհիվ:
La Repubblica թերթը գրում է, որ ահաբեկչական հարձակման հնարավոր թիրախներից մեկը եղել է Միլանի սինագոգը: Մասնավորապես, Իտալիայի իրավապահ մարմինները որսացել են մարոկկացու հաղորդագրությունները, որոնցում նա խոսել է «ջիհադի առաքելության մասին», իսկ նրա համակարգչում հայտնաբերվել է սինագոգի մանրամասն հատակագիծը, որտեղ նշված են դրանում առկա անվտանգության միջոցները, ոստիկանության աշխատակիցների թիվը և մուտքի հնարավոր ճանապարհները:
Քննիչները չեն բացառում, որ երիտասարդը համախոհներ է ունեցել տեղում և արտասահմանում:
Իտալիային զուգահեռ, նման գործողություններ են անցկացվել նաև մեծ Բրիտանիայում և ԱՄՆ-ում՝ այն երկրներում, որոնցում ապրում են մարոկկացու հետ շփում ունեցած ինտերնետ օգտատերերը:
