Christie’s աճուրդի տունը վաճառքի է հանել Պաբլո Պիկասոյի «Երեխան և աղավնին» կտավը: Այս մասին գրում է The Sunday Times-ը:
Նկարի գնորդն անհատապես կընտրվի, այսինքն աճուրդ տեղի չի ունենա: Նկարի արժեքը կազմում է մոտ 80 միլիոն դոլար:
Նկարը գտնվում է մասնավոր ձեռքում, սակայն թե կոնկրետ ում է պատկանում այն, հայտնի չէ, չի հրապարակվում: Ամենայն հավանակնությամբ, նկարի սեփականատերը Կրիստաբել Էյբերկոնեուի ժառանգներից մեկն է, ով իր հերթին նկարը ժառանգել է Սեմուել Կուրտոյից, ով հարուստ հավաքածու ուներ։ Վերջինս նկարը գնել էր 1928 թվականին:
Էյբերկոնեուն մահացել է 1974 թվականին, ինչից հետո նկարն անցել է նրա երեխաներից մեկին: 1974 թվականից կտավը ցուցադրվել է Ազգային պատկերասրահում, 2011 թվականին փոխանցվել է Կուրտոյի անվան պատկերասրահին, իսկ 2012 թվականի հունվարից ցուցադրվում է «Թեյթ» պատկերասրահում:
Բրիտանացի գնորդները գերակայության իրավունքով վաճառքի մասին հայտարարության պահից սկսած երեք ամսվա ընթացքում կարող են գնել նկարը: Սակայն, ինչպես նշում է հրատարակությունը, ամենայն հավանականությամբ, կտավը կվաճառվի արտասահմանում, քանի որ տվյալ պահին որևէ բրիտանական թանգարան իրեն նման շքեղություն թույլ տալ չի կարող:
Այսօրվա դրությամբ Պիկասոն աշխարհում «ամենթանկ» նկարիչներից մեկն է: Մասնավորապես նրա «Մերկը, կանաչ տերևներ և կիսանդրի» ստեղծագործությունն արվեստի գործերի մեջ իր արժեքով ռեկորդային է: Այն 2010 թվականին Christie’s աճուրդում վաճառվել է 106.5 միլիոն դոլարով։
