IRINN-ի փոխանցմամբ` Իրանի Իսլամական Հանրապետության գերագույն ղեկավար և հոգևոր առաջնորդ, նախկին նախագահ (1981-1989), այաթոլլահ Ալի Խամենեին առաջինն է քվեարկել այսօր Իրանում մեկնարկած խորհրդարանական ընտրություններում:
Նա քվեարկել է թիվ 110 ընտրատեղամասում: Քվեարկելուց հետո նա լրագրողների հետ զրույցում բնակչությանը կոչ է արել ակտիվորեն մասնակցել ընտրություններին. «Խորհրդարանական ընտրությունները կարևոր են երկրի անվտանգության ու կայունության համար: Ընտրությունները մշտապես վճռորոշ դեր են խաղացել մեր իրականության մեջ: Երեք տասնամյակ առաջ տեղի ունեցավ իսլամական հեղափոխությունը, և մեր ժողովուրդն ընթանում է ճիշտ ճանապարհով: Բոլոր թեկնածուներին մաղթում եմ հաջողություն»:
Նշվում է, որ 290 պատգամավորական մանդատների համար պայքարելու են 3467 թեկնածուներ: Ընտրությունների համար բացվել են 46,062 ընտրատեղամասեր, որոնցից 14,307-ը մոբիլ են, այսինքն՝ քվեարկության համար դրանք հասցվում են անմիջապես ընտրողների մոտ: Ընտրությունների արդյունքները կարող են հրապարակվել քվեարկության ավարտից (տեղական ժամանակով ժամը 18.00-ին) 48-72 ժամ հետո:
Հիմնական ընդդիմադիր կուսակցությունները հրաժարվել են ընտրություններին մասնակցելուց՝ դա պատճառաբանելով նրանով, որ կասկածում են ընտրական գործընթացի թափանցիկությանը: Նման կերպ է վարվել ռեֆորմիստական բլոկը՝ «Մասնակցության իսլամական իրանական ճակատը»: Իսկ դա նշանակում է, որ «Աբադգարան» պահպանողական կուսակցությունների իշխող ալյանսն առանց որևէ դժվարության հաղթանակ է տանելու ընտրություններում:
Հիշեցնենք, որ Իրանում խորհրդարանական ընտրություններն անցկացվում են 4 տարին մեկ անգամ՝ նախորդ գումարման խորհրդարանի լիազորությունների ժամկետի ավարտից (2012 թվականի հունիս) 3 ամիս առաջ:
Ի դեպ, 3 օր առաջ Խամենեին հայտարարել էր, որ ուրբաթ օրն Իրանում կայանալիք խորհրդարանական ընտրությունները կդառնան իմպերիալիզմին ուղղված ապտակ.
«Ալլահի կամքով՝ մենք ուրբաթ օրը մեր անցկացրած ընտրություններով ապտակ կհասցնենք գերտերություններին, որի ուժը կգերազանցի այն ապտակին, որն Իրանի ժողովուրդը հասցրեց իսլամական հեղափոխության հաղթանակի օրը:
Ընտրությունների օրն ի ցույց կդնի Իրանի ժողովրդի ուժեղ կամքը և մեր թշնամիներին կստիպի գիտակցել մեր երկրի դեմ ուղղված ջանքերի անարդյունավետությունը: Առաջիկա խորհրդարանական ընտրություններն իրենց նշանակությամբ գերազանցում են բոլոր նախորդ ընտրությունները, ինչի համար էլ անհրաժեշտ է, որ դրանց մասնակցի ողջ ժողովուրդը»:
