Բելառուսի գլխավոր դատախազությունում դիմում է ստացվել Նորվեգիայի դատախազությունից՝ ահաբեկիչ Անդերս Բրեյվիկի քրեական գործի հետաքննությանն աջակցելու խնդրանքով: Այս մասին փետրվարի 24-ին հայտնել է Բելառուսի գլխավոր դատախազության կայքը:
Ինչպես հաղորդվում է. «Մինսկի մետրոյում ահաբեկչության հետաքննության ընթացքում բելառուսական իրավապահ մարմինների գործունեությունը, ինչպես նաև բարձր պրոֆեսիոնալիզմը և փոխազդեցության արդյունավետությունն օտարերկրյա պետությունների և նրանց իրավապահ մարմինների կողմից ճանաչում է ստանում»:
Նորվեգական կողմին մասնավորապես հետաքրքրում են 2008 թվականին Բելառուսում Բրեյվիկի գտնվելու հանգամանքները, այդ թվում՝ տեղեկություններ նրա «կոնտակտների և այն վայրերի մասին, որտեղ նա եղել է»:
Հուլիսի 22-ին Անդերս Բրեյվիկը Նորվեգիայում կրկնակի ահաբեկչություն էր իրագործել, որի արդյունքում զոհվել էր 77 մարդ: Սկզբում Բրեյվիկը պայթյուն էր իրականացրել Օսլոյում, իսկ մի քանի ժամ անց Ուտոյա կղզում՝ իշխող «Նորվեգիայի աշխատանքային կուսակցության» երիտասարդական ճամբարում գնդակահարելով 69 մարդու:
