Թուրքական Haberler.Com կայքի փոխանցմամբ՝ Թուրքիայի արդարադատության նախարար Սադուլլահ Էրգինն անդրադարձել է Պետական վերահսկիչ խորհրդի (DDK) կողմից Ստամբուլի հայկական «Ակօս» շաբաթաթերթի հիմնադիր-խմբագրապետ Հրանտ Դինքի սպանության գործով պատրաստված զեկույցին:
Էրգինը հայտարարել է, որ եթե DDK-ի զեկույցում ի հայտ գան նոր տարրեր, ապա իրենք կարող են Դինքի սպանության գործով սկսել նոր հետաքննություն:
Հիշեցնենք, որ DDK-ի 653 էջանոց զեկույցը հրապարակվել է փետրվարի 20-ին, որի պատրաստումը տևել է 1 տարի: Զեկույցում նշված է, որ անվտանգության ծառայություններն ու Ժանդարմերիան նախապես իմացել են Դինքին սպառնացող վտանգի մասին, սակայն քայլեր չեն ձեռնարկել դա կանխելու ուղղությամբ և չեն համագործակցել Դինքի կյանքը պահպանելու հարցում: Բացի այդ, նշված է որ Դինքի սպանության հետաքննման ժամանակ եղել են թերացումներ, և որ դրանք իրականացրած պաշտոնյաները պետք է դատվեն առաջին ատյանի դատարանում:
