Գալիք ընտրություններում ամենից շատ ձայներ կստանան ՀՀԿ-ն, ԲՀԿ-ն և ՀԱԿ-ը: Այսօր լրագրողների հետ հանդիպման ժամանակ իր տեսակետը հայտնեց սոցիոլոգ Ահարոն Ադիբեկյանը` ներկայացնելով «Սոցիոմետր» սոցիոլոգիական ծառայության անցկացրած հարցումների արդյունքները:
«ՀՀԿ-ն ունի 16,0%, ԲՀԿ-ն՝ 14,7 %, ՀԱԿ-ն ունի 3,5%, ՀՅԴ-ն՝ 2,5%, ՕԵԿ-ն ունի 2,1%, «Ժառանգություն»-ը՝ 2,1%,»,- նշեց բանախոսը` հավելելով, որ «Ազատ դեմոկրատներ» կուսակցությունն ունի 0,1%:
Ըստ Ա. Ադիբեկյանի` գալիք ընտրությունների ելքը որոշվելու է ՀՀԿ-ԲՀԿ մրցակցության արդյունքում: «Ներկա պահին ԲՀԿ-ի և ՀՀԿ-ի «վարկանիշները» մոտ են իրար, թեպետ ԲՀԿ-ն 4-5 ամիս է՝ զբաղվում է իր իմիջի ամրապնդմամբ, իսկ ՀՀԿ-ն շատ թույլ է արձագանքել ՀԱԿ-ի «երկխոսության հրավերներին»: Կրկնվում է 2007թ. սցենարը, երբ ԲՀԿ-ն մեծ միավորներ հավաքեց, բայց չկարողացավ պահպանել իր առավելությունը: Ակնհայտ է, որ 2007թ. հունվարին ԲՀԿ-ն առավելություն ուներ ՀՀԿ-ի նկատմամբ, իսկ այժմ այն ավելի համեստ է»,- եզրափակեց Ա. Ադիբեկյանը:
Նշենք, որ հարցումներն իրականացվել են 2012թ. հունվարին՝ ՀՀ բոլոր մարզերի 1650 չափահասների շրջանում: Բանախոսի համոզմամբ` դրանք դեռևս ենթակա են փոփոխությունների:
