Չինացի և ամերիկացի գիտնականները Չինաստանում հայտնաբերել են յուրօրինակ անտառ, որի տարիքը հասնում է 298 միլիոն տարվա: Այն Իտալիայի Պոմպեյ քաղաքի նման, որը հաշված ժամերում ծածկվել է Վեզուվի հրաբխային մոխրի հաստ շերտով, պատված է հրաբխային մոխրաշերտով: Այս մասին հայտնում է mir24.tv-ն:
Ինչպես նշել է հետազոտության հեղինակներից մեկը` հնէաբուսաբան Գերման Պֆեֆկորնը ԱՄՆ Փենսիլվանիա համալսարանից, գիտնականները հայտնաբերել են «ժամանակի իսկական պարկուճ», որը մինչ մեր օրերն է հասցրել օրգանական իրեր, որոնք վերագրվում են պերմյան շրջանին:
Տեղանքը, որտեղ հայտնաբերվել է «պահածոյացված անտառը», ունի շուրջ 1 քառակուսի կմ տարածք: Այն գտնվում է ածխահանքերի տարածքում: Բնականաբար, անտառը քարացած վիճակում է, սակայն դրա տարրերը բավական հեշտ է տարորոշել:
«Ամեն ինչ պահպանվել է հրաշալի վիճակում: Մենք կարող ենք տեսնել ճյուղը տերևներով, մի քանի խոշոր ճյուղեր, անգամ ծառի կոճղերը, ինչը շատ հետաքրքիր է»,- նկատում է Պֆեֆերկորնը:
Արդեն հայտնի է դարձել ծառերի 6 տեսակ, որոշներն ունեցել են 25 մետր բարձրություն: Պերմյան շրջանում դեռ չէին ձևավորվել փշատերևներն ու տերևավորները, բույսերն ավելի շատ հիշեցրել են թփեր, որոնք բազմացել են սպորներով:
Գիտնականները ենթադրում են, որ տեսակների մահացման հետևանքով (սրանով է բնորոշվում պերմյան շրջանի վերջը) ոչնչացել է ջրային տեսակների՝ 90 և ցամաքային տեսակների մինչև 70 տոկոսը:
Հետազոտությունը հրապարակված է ԱՄՆ ԳԱ ամսագրում:
