Արդեն մի քանի ամիս է գործարար Սիլվա Համբարձումյանը լրատվամիջոցների և հանրության ուշադրության կենտրոնում է: Դեռ Սյունիքի մարզպետ Սուրեն Խաչատրյանի հետ կատարված միջադեպը մի կարգին չմարսած, հիմա էլ մանկապիղծ Սերոբ Տեր-Պողոսյանի կինը` Մադլեն Թաշճյանն է դատական հայց ներկայացրել նրա դեմ: Մադլեն Թաշճյանը պահանջում է ներողություն խնդրել Սիլվա Համբարձումյանին այն բանի համար, որ ասուլիսում գործարար տիկինը նշել էր, թե Մադլեն Թաշճյանը շատ բան գիտի 1999-ի դեպքերի վերաբերյալ և կհրապարակի, եթե ամուսնու նկատմամբ խիստ պատիժ կիրառեն:
Բացի այդ, Սիլվա Համբարձումյանը, ինչպես և ենթադրվում էր, որոշել է ԱԺ առաջիկա ընտրություններում իր թեկնածությունն առաջադրել մեծամասնական ընտրակարգով: Թեև նա այդ լուրը հաստատեց, սակայն դեռ չշտապեց հրապարակել, թե կոնկրետ որ կուսակցության մեջ է ընդգրկվելու և ավելացրեց, որ արտերկրում է և Հայաստան վերադառնալուն պես ասուլիս կհրավիրի ու կասի այդ մասին: Թեև որևէ մեկը չի կասկածում, որ խոսքը Հանրապետական կուսակցության մասին է: Ինչևէ. Սիլվա Համբարձումյանի համար չասենք լավ, բայց գոնե հետաքրքիր ժամանակներ են:
Մեզ հուզող մի քանի հարցի պատասխան, այնուամենայնիվ, ստացանք Սիլվա Համբարձումյանից:
– Տիկին Համբարձումյան, ինչպե՞ս կմեկնաբանեք տիկին Մադլենի՝ Ձեզ դատի տալու մասին լուրերը:
– Դա, ըստ էության, թյուրիմացություն է, շփոթմունք: Առաջիկայում դատական գործընթաց է, որին միանշանակ պետք է մասնակցեմ: Գուցե ինքը չի հիշում: Կարծում եմ՝ դատարանում կհիշի:
Ամբողջ խնդիրն այն է, որ իմ առաջին ասուլիսի ժամանակ ես ասացի, որ 1999 թվականին Սերոբ Տեր-Պողոսյանին են տվել առաջին հանքը՝ Ախթալայում: Լրագրողները թյուրիմացաբար գրել էին, թե 1999 թիվը ես կապում եմ հոկտեմբերի 27-ի հետ: Բայց ես հոկտեմբերի 27 չեմ ասել: Ես ընդամենը արձանագրել եմ առաջին հանքը շահագործելու մասին տեղեկատվությունը:
– Ըստ Ձեզ, ի՞նչ գիտի Մադլենը հոկտեմբերի 27-ի մասին:
– Ես չեմ կարող ոչինչ ասել, թե նա ինչ գիտի կամ ինչ չգիտի: Վրդովված նստած էր «Մարիոթ Արմենիա» հյուրանոցում, քանի որ ընկերուհիներս էլ էին այնտեղ, ասացի, որ կարող եք ձեր վրդովմունքն արտահայտել լրագրողներին:
– Դուք ցանկանում եք պատգամավոր դառնալ: Վտանգ չե՞ք տեսում , որ Սյունիքի մարզպետը կարող է ձեռք բարձրացնել Ձեզ վրա ԱԺ-ում, ինչպես «Մարիոթում» տեղի ունեցած դեպքն էր:
– Քանի որ Սյունիքի մարզպետ Սուրիկ Խաչատրյանը պատգամավոր չէ, ըստ էության, վտանգ չեմ տեսնում:
– Ինչո՞ւ եք ցանկանում պատգամավոր դառնալ:
– Կարծում եմ՝ օրենսդիրում անհրաժեշտ է իմ դերը: Ազգային ժողովում հնարավորություն կլինի օրենքներ գրել, ներկայացնել ու քննարկում կազմակերպել: Նոր օրենքներ են անհրաժեշտ, որ ստեղծվեն ի շահ հասարակության:
– Բիզնե՞ս շահի, թե՞ հասարակական շահի համար եք մուտք գործում Ազգային ժողով:
– Ասեմ, որ իմ հիմնական բիզնեսը արտասահմանում է: Ոչ թե ես Հայաստանից եմ գումար տանում, այլ հակառակը, բերում եմ: Ես միշտ էլ աշխատել ու աշխատում եմ առանց տանիքի, այսպես ասած, առանց «կռիշի»:
– Ի՞նչը կփոխեիք Ազգային ժողովում:
– Կփորձեմ, որպեսզի ակներև լինեն դրական շարժերը: Օրենքներ, որոնք կարծում եմ՝ հասարակության բոլոր շերտերի համար էլ հավասար կլինեն:
– Այս ընտրությունների արդյունքում կանայք խորհրդարանում կազմելու են 20 տոկոս, մի՞թե կարծում եք, որ կանայք կարող են փոխել խորհրդարանը:
– Խնդիրը փոխել-չփոխելը չէ: Խնդիրը մարդկանց հասանելի օրենքներ մշակելն ու լրամշակելն է: Իսկ ինչ վերաբերում է կանանց հարցերին, ապա կարծում եմ, որ կին պատգամավորը կարող է խորհրդարանում պայքարել մարդու իրավունքների համար:
