«Առաջին լրատվական»-ն արդեն տեղեկացրել էր, որ Եվրոպական միությունը ծրագրում է Հայաստանի հետ առևտրային ազատ գոտի ստեղծելու մասին բանակցություններ սկսել: Այս մասին երեկ հայտարարել էր է Եվրամիության առևտրի հարցերով հանձնակատար Կարել դե Գուխտի հայտարարության մեջ:
«Ազատ առևտրի շուրջ բանակցությունների մեկնարկը շրջադարձային կետ է Հայաստանի և Եվրամիության հարաբերություններում»,– հայտարարել է Եվրամիության առևտրի հարցերով հանձնակատար Կարել դե Գուխտը և ընդգծել, – «Մենք մտնում ենք նոր փուլ, որը նոր՝ խորը և հավակնոտ մակարդակի կբարձրացնի մեր տնտեսական հարաբերությունները»։
Այս առթիվ Եվրամիության ընդարձակման և հարևանության հարցերով հանձնակատար Շտեֆան Ֆյուլեի խոսնակը Ազատություն ռադիոկայանին ասել է. «Սա շատ կարևոր քայլ է, քանի որ դրա նպատակն է խթանել տնտեսության զարգացումն ու ներդրումները Հայաստանում, որը առանցքային գործընկեր է Եվրամիության համար տարածաշրջանում: Այս համաձայնագիրը հայաստանցի գործարարների համար առավել շահավետ պայմաններ կստեղծի միասնական եվրոպական շուկա դուրս գալու համար, ինչն իր հերթին կնպաստի տնտեսության զարգացմանն ու գործազրկության կրճատմանը երկրի ներսում»։
Ըստ ռադիոկայանի, փորձագետները փաստում են՝ բանակցությունները կարող են տարիներ տևել, դրանց ընթացքը և արագությունը կախված է միմիայն Հայաստանի իշխանություններից և բարեփոխումներ կատարելու նրանց պատրաստակամությունից։
«Անշուշտ, որքան արագ դրանք ավարտվեն, այնքան շուտ և շատ կշահեն Հայաստանի քաղաքացիները, սակայն մենք միշտ ենք նշում, որ այս հարցում կարևոր է ոչ այնքան ժամկետը, որքան կատարվող քայլերի բովանդակությունը»,– ասել է Եվրամիության ընդարձակման հարցերով հանձնակատարի խոսնակը՝ ընդգծելով, որ հաջողության հասնելու համար Հայաստանը պետք է իրագործի Բրյուսելի առաջադրած բոլոր պահանջները։ Իսկ դրանք իրականում շատ են՝ Հայաստանում արտադրվող ապրանքների որակից, սանիտարահիգիենիկ պայմաններից մինչև առևտրի ազատականացում, մոնոպոլիաների վերացում և մաքսային համակարգի բարեփոխում։
Հատկանշական է, որ Եվրամիությունն այսօր արդեն Հայաստանի ամենամեծ առևտրային գործընկերն է: Մասնագետները վստահ են որ երբ այս համաձայնագիրը կնքվի ՝ հարաբերությունները էլ ավելի կխորանան և Հայաստանում արտադրված ապրանքը այլևս կարող է անարգել և շահավետ պայմաններով մուտք գործել շուրջ կես միլիարդ ապահովված և բարձր եկամուտի տեր բնակչություն ունեցող Եվրամիության շուկա։
Հիշեցնենք, որ 2011 թվականին Եվրամիությունը դարձել է Հայաստանի խոշոր առևտրային գործընկերը: Երկկողմ առևտրային շրջանառության ծավալը տարվա ընթացքում կազմել է 960 միլիոն եվրո:
