Ինչպես հաղորդում է Reuters գործակալությունը, Չինաստանը պատրաստվում է գնել Իսպանիայի պետական պարտատոմսերը: Գործարքի ընդհանուր գումարը կկազմի 6 մլրդ եվրո և կօգնի Իսպանիային խուսափել լուրջ տնտեսական խնդիրներից: Այս մասին հայտարարել է Չինաստանի փոխվարչապետ Լի Կեցյանը: Նա եռօրյա պաշտոնական այցով գտնվել է Մադրիդում: Չին պաշտոնյան հայտարարել է, որ իր երկիրը վստահում է Իսպանիայի ֆինանսական համակարգին` ավելացնելով, որ իրենք պատրաստվում են գնել իսպանիայի պետական պարտատոմսերը` աջակցելու համար այդ երկրի ֆինանսական համակարգին:
Դեկտեմբերի վերջին մամուլում տեղեկություններ էին հայտնվել առ այն, որ Չինաստանը պատրաստվում է 4-5 մլրդ դոլարի պարտատոմսեր գնել նաև Պորտուգալիայում: Ընդ որում, այդ գործարքը պետք է իրականացվի 2011 թ. առաջին եռամսյակում:
Այս քայլով չինական կառավարությունը լուրջ կախվածության մեջ է դնում եվրոպական այս երկրներին, քանի որ ցանկացած պահի կարող է վաճառել այդ պարտատոմսերը և լուրջ խնդիրներ առաջացնել այդ պետությունների համար: Բանն այն է, որ ստեղծված իրավիճակում մի քանի եվրոպական երկիր տնտեսական դեֆոլտի առաջ են կանգնած, ինչը նրանց դեռ երկար տարիներ թույլ չի տա հետ գնել պետության կողմից թողարկված պարտատոմսերը:
Եվրագոտում բյուջեի մեծ ճեղքվածքներ այս պահին ունեն չորս երկիր` Հունաստանը, Իռլանդիան, Պորտուգալիան և Իսպանիան: