ԱԺ-ում այսօր մեկնարկած համամասնական ընտրակարգի վերաբերյալ խորհրդարանական լսումներին ելույթ ունեցավ ՀԱԿ ներկայացուցիչ Սամվել Աբրահամյանը և նշեց, որ ԱԺ-ում մեծ թիվ են կազմում խոշոր գործարարները:
«Վերջին երկու ԱԺ ընտրություններում գործարարները մեծ թիվ են կազմում, մինչդեռ երկրի բնակչությունը աղքատ է: Այսպիսով մեր հասարակության մեծամասնությունը զրկված է ԱԺ-ում իր սոցիալական շահերը ներկայացնելու հնարավորությունից: Ուրեմն այսօրվա իրողություններից ելնելով՝ պետք է քաղաքական համակշռվածություն ապահովել»,- նկատեց ՀՀՇ ներկայացուցիչը:
ԲՀԿ խմբակցության պատգամավոր Նաիրա Զոհրաբյանը իր ելույթում նշեց՝ կայացած ժողովրդավարական երկրում նման քննարկում չէր կարող լինել. «Ցանկացած ընտրակարգով պետք է անցկացնել ազատ և արդար ընտրություններ, ուստի պետք չէ վկայակոչել միջազգային կառույցները: Արդյոք հարյուր տոկոսանոց ընտրակարգին անցումը համադարմա՞ն է լինելու բոլոր մեր խնդիրներին…
Լինենք անկեղծ, իհարկե՝ ոչ, բայց մենք բոլորս, իհարկե, հրաշալի հասկանում ենք, որ ընտրակեղծարարության լյուֆտը, որն այսօր տալիս է մեծամասնական ընտրակարգը, շատ ավելի լայն է, և այդ ընտրակարգով ընտրակեղծարարության մեխանիզմները շատ ավելի ճկուն են»:
