Ռուսական Regnum լրատվական գործակալության փոխանցմամբ՝ Լոնդոնում գտնվող International Alert միջազգային կազմակերպությունը, որը մասնագիտացել է հակամարտությունների ուսումնասիրման մեջ, հետազոտություն է անցկացրել Հարավային Կովկասի հակամարտությունների վերաբերյալ:
Այդ հետազոտությունը ստացել է «Առասպելներ և հակամարտություն» անվանումը, այն ամբողջովին հրապարակվելու է ավելի ուշ: Դրա բաղկացուցիչ մասերից մեկը կազմել է այն, թե ինչպես են հայերը որակվում ադրբեջանական բլոգային ոլորտում:
Հետազոտությունը ցույց է տվել, որ հայերի նկատմամբ ատելությունն ինտերնետում շատ ավելի ուժեղ է, քան ավանդական ԶԼՄ-ներում: Հայերին որակում են որպես «անմարդակային հակառակորդ», ինչը բնորոշ է հակամարտությունների մեծամասնությունը: Թեև ադրբեջանական բլոգները ստեղծվել են ավելի քան 10 տարի առաջ, դրանք հանարաճանաչ են դարձել միայն վերջին 2-3 տարում:
Freedom House-ի տվյալներով՝ Ադրբեջանում առկա է 27,000 բլոգ: Դրանցում ամենաշատ քննարկվող խնդիրներն են Ղարաբաղյան հակամարտությունը, Հայաստանի ու Ադրբեջանի միջև հարաբերությունները և հայերի կերպարի ընկալումը:
Հայերի նկատմամբ մի շարք վիրավորական բառեր (ստախոս, հարբեցող, մարմնավաճառ, քարանձավային քարոզիչ) գործածելուց բացի, ադրբեջանական բլոգներում անգամ նշվում է, թե «հայը մարդ չէ», և որ նրան «կարելի է հանգիստ սպանել ու մահանալու հնարավորություն տալ»:
Ահա թե ինչպես է մի ադրբեջանցի բլոգեր արձագանքել շփման գծում ադրբեջանցի զինվորի արձակած կրակոցից հայ քաղաքացիական անձի սպանության մասին ստացված հաղորդագրությունը. «Ամեն դեպքում հայերի քանակը մեկով պակասեց: Դա այդ հաղորդագրության ամենաերջանիկ մասն է»:
Հետազոտության հեղինակները նշում են. «Այս ամենը հերթական անգամ վկայում է, որ չնայած իր դրական պոտենցիալին՝ միշտ չէ, որ ինտերնետը դրական ազդեցություն է ունենում, քանի որ նա կարող է օգտագործվել կարծրատիպերի ամրագրման համար և դրանով իսկ համապատասխան հասարակական կարծիքի ձևավորման համար»:
