Քաղցկեղի բուժումը վաղ կանխարգելումն է: Այսօր լրագրողների հետ հանդիպման ժամանակ նման տեսակետ հայտնեց Հայ-ամերիկյան առողջության կենտրոնի ռադիոլոգիայի բաժնի վարիչ Անի Հակոբյանը` ներկայացնելով քաղցկեղ հիվանդության երիտասարդացման միտումները:
Նա նշեց, որ քաղցկեղը նենգ և չար հիվանդություն է, որը չունի բուժում: Ըստ նրա`միակ կանխարգելման միջոցը հիվանդության շուտ բացահայտումն է: «Հիվանդության երիտասարդացման միտում կա, որում մեծ նշանակություն ունեն տեխնոլոգիաները: Սրանից խուսափելու համար երիտասարդ կանայք նույնպես պետք է գործիքային զննման գնան, որովհետև ոչ մի սարսափելի բան չկա սոնոգրաֆիկ զննում անցնելու մեջ: Ամուսնությունից առաջ պետք է զույգը գնա բոլոր տեսակի զննումների»,- նշեց Անի Հակոբյանը`հավելելով, որ չարորակ հիվանդությունների շրջանում տարածված է կրծքագեղձի քաղցկեղը, որը նաև գեներով է փոխանցվում: Ուստի մասնագետը պահանջեց այն մարդկանցից, ովքեր ընտանիքում ունեն այս հիվանդությամբ տառապող անդամներ, զննություն անցնեն:
Նրա համոզմամբ` քաղցկեղի վաղ կանխարգելումը բուժման հիմքն է, և մարդն այս հիվանդությունից բուժված է համարվում, երբ բուժումից հինգ տարի անց հիվանդությունը չի կրկնվում:
Համատեղ ասուլիսի ընթացքում նույն կենտրոնի գործադիր տնօրեն Խաչանուշ Հակոբյանն ասաց, որ մինչև 35 տարեկանը պետք է անցնել սոնոգրաֆիկ հետազոտություն, իսկ 35-ից հետո՝ նաև մամոգրաֆիկ հետազոտություն: Անդրադառնալով գնային քաղաքականությանը` Խաչանուշ Հակոբյանն ասաց, որ վերջին տարիներին իրենց բուժհաստատությունում զննման գնացուցակը փոփոխության չի ենթարկվել: «Մամոգրաֆիան արժե 11.000 դրամ, որը ցանկացած կին կարող է իրեն թույլ տալ տարին մեկ անգամ հանուն իր առողջության: Նաև կան անվճար պայմաններ` բազմազավակ և պատերազմում զոհվածների կանանց համար: Նախկինում նաև ունեինք զեղչերի ամիս»,- նշեց բանախոսը`հավելելով, որ վերանորոգման աշխատանքներից հետո այդ ավանդույթը վերացվեց, սակայն հնարավոր է վերականգնվի:
