Այսօր երեկոյան ՀՀ ոստիկանության հասարակայնության հետ կապերի և լրատվության վարչության պետ Աշոտ Ահարոնյանը լրագրողների հետ ճեպազրույց էր հրավիրել, որի ընթացքում ներկայացրեց «Հայկական ժամանակ» օրաթերթի թողարկման պատասխանատու Հայկ Գևորգյանի կալանավորման առնչությամբ պաշտոնական տեսակետը: Ոստիկանության ներկայացուցիչները, սակայն, պաշտոնական պարզաբանումը ներկայացնելուց հետո հրաժարվեցին լրագրողների հարցերին պատասխանել:
Ոստիկանության պարզաբանումը ներկայացրեց ոստիկանության քննչական գլխավոր վարչության բաժնի պետ Արսեն Այվազյանը: Ըստ նրա՝ 2012 թվականի հունվարի 13-ին, ժամը 17.30-ի սահմաններում Երևանի Մհեր Մկրտչյան փողոցում Հայկ Գևորգյանը վրաերթի է ենթարկել Աշոտ Ֆրանգուլյանին և հեռացել դեպքից վայրից: Այվազյանի խոսքերով, արդեն իսկ իրականացվել է դատաբժկական փորձաքննություն, որը պարզել է, որ Ֆրանգուլյանը ստացել է ձախ ծնկոսկրի շրջանի կոտրվածք, որը գնահատվել է միջին ծանրության վնասվածք:
Քննիչի խոսքերով քրեական գործ է հարուցվել Գևորգյանի նկատմամբ, վերջինս հրավիրվել է հարցաքննության, բայց չի ներկայացել, ինչն էլ պատճառ է հանդիսացել հունվարի 23-ին նրա նկատմամբ հետախուզում հայտարարելու համար և նույն օրը նախաքննական մարմինը դիմել է դատարան ու վերջինիս որոշմամբ Գևորգյանի նկատմամբ խափանման միջոց է ընտրվել կալանավորումը:
Արսեն Այվազյանն ասաց, որ Հայկ Գևորգյանը եռօրյա ժամկետում կարող է դիմել դատարան վիճարկելու իր խափանման միջոցը կալանք ընտրելու վերաբերյալ որոշումը: «Մինչև փետրվարի 6-ը ներառյալ Գևորգյանը կարող է վիճարկել կալանավորման մասին որոշումը, և կմնա նա կալանավորված, թե ոչ՝ կորոշի դատարանը»,- հայտարարեց քննիչը:
Հիշեցնենք, որ «Հայկական ժամանակ» օրաթերթի թողարկման պատասխանատու Հայկ Գևորգյանը կալանավորվել է այսօր առավոտյան տանից դուրս գալուց հետո` իր ավտոմեքենան նստելու պահին: Նա այժմ պահվում է «Նուբարաշեն» ՔԿՀ-ում:
