Վրացական «Ռեզոնանսի» թերթի փոխանցմամբ՝ հաջորդ շաբաթ Վրաստանի խորհրդարանը դիտարկելու է ինգուշ ժողովրդի «ցեղասպանության» հարցը: Խոսքը 1944 թվականին ստալինյան ռեժիմի կողմից իրականացված՝ դեպի Ղազախստան և Կենտրոնական Ասիա ինգուշ ժողովրդի զանգվածային բռնագաղթի մասին է:
Սփյուռքի և Կովկասի ժողովուրդների հետ խորհրդարանական կոմիտեի նախագահ Նուգզար Ցիկլաուրին հայտարարել է, որ իրենց կողմից այդ հարցի դիտարկման մեջ չպետք է փնտրել քաղաքական ենթատեքստ: Ցիկլաուրին հավելել է, որ վերջնական որոշումը կկայացվի գիտական ու փորձագիտական գնահատականներից հետո:
Վրաստանին դիմած ինգուշները հիշեցրել են, որ 1944 թվականին բռնագաղթեցվել է ավելի քան 134,000 մարդ: Ընդ որում, ստալինյան տեռորից մահացել է ավելի քան 50,000 ինգուշ:
Հիշեցնենք, որ նախորդ տարվա մայիսի 20-ին Վրաստանի խորհրդարանը Ցարական Ռուսաստանի կողմից չերքեզների նկատմամբ իրականացրած զանգվածային սպանություններն ու բռնագաղթը միաձայն ճանաչեց ցեղասպանություն:
Դրանով Վրաստանը համարձակ քայլ կատարեց` դառնալով աշխարհի առաջին երկիրը, որը նման քայլի է գնում մոտ 150 տարի առաջ տեղի ունեցած դեպքերի առումով: Չերքեզական ենթադրյալ ցեղասպանությունն իրականացվել է 1860-ական թվականներին, երբ պատերազմում սպանվեցին հարյուր հազարավոր մարդիկ:
