«ՀԺ»-ն գրում է, որ Կառավարության այսօրվա նիստում կքննարկվի ՀՀ պաշտպանության նախարարությանը պատկանող մի քանի հսկայական տարածք վաճառելու թույլտվության հարցը:
«Տարածքները գտնվում են Երևանի Շենգավիթի վարչական շրջանում, և դրանց ընդհանուր տարածքը կազմում է ավելի քան 26 հեկտար, ընդհանուր առմամբ, կան 17 հազար քմ արտադրական շինություններ և 123 հազար քմ ընդհանուր մակերես ունեցող վարչական շենք: Եվ այդ ամենը ՊՆ-ն նախատեսում է վաճառել 7 մլրդ դրամ և 3 մլն 700 հազար դոլարով: Այսինքն, վաճառքի ընդհանուր գինը գործող փոխարժեքով կկազմի 22.5 մլն դոլար: Ստացվում է, որ Շենգավիթի շրջանում այդ հսկայական տարածքները ՊՆ-ն վաճառում է քառակուսին 86 դոլարով, չհաշված շենքի գինը: Իսկ Շենգավիթում գտնվող 123 հազար քմ տարածքով վարչական շենքի շուկայական գինը կազմում է առնվազն 30 մլն դոլար:
Մի խոսքով, վաճառվող տարածքի և շենք-շինությունների շուկայական գինը կազմում է առնվազն 50 մլն դոլար (ըստ ՀՀ անշարժ գույքի պետկադաստրի տվյալների): Իհարկե, նման մասշտաբների տարածքի դեպքում կադաստրի տվյալները այնքան էլ կիրառելի չեն, բայց տվյալ գույքի իրական գինը կարող է որոշվել միայն մրցակցային վաճառքի՝ մրցույթի կամ աճուրդի պարագայում:
Այլ կերպ ասած, ՊՆ-ն իր ունեցվածքը վաճառում է ուղիղ կես գնով: Ընդ որում, վաճառում է առանց մրցույթի, առանց աճուրդի՝ ուղիղ ձևով: Սա էլ բավական չէ, գնորդը այդ գումարը կարող է վճարել 5 տարվա ընթացքում: Սա էլ բավարար չէ, գնորդը կարող է ոչ թե փող տալ, այլ ծառայություններ մատուցել ՊՆ-ին: Համաձայնեք, ավելի քան մութ պատմություն է:
Զուգադիպություն է, բայց այս մութ գործարքով տարածքը վաճառվելու է «Նայթբրիջ» անունը կրող մի ՍՊԸ-ի (թարգմանաբար՝ «Գիշերային կամուրջ»): Ինչ կազմակերպություն է սա, ինչ է անելու այդ տարածքում, պարզել չհաջողվեց: Հայտնի է միայն, որ ՀՀ-ում գործող նման անվանմամբ կազմակերպություն չկա ողջ համացանցում»:
