Եգիպտոսի ամենաազդեցիկ քաղաքական ուժը՝ «Մուսուլման եղբայրները», հայտարարել են, որ առաջիկա նախագահական ընտրություններում չեն պատրաստվում սատարել իսլամիստական որևէ ուժի առաջադրած թեկնածուի: Այս մասին հաղորդում է MENA գործակալությունը:
«Մենք ինքներս թեկնածու չենք առաջադրի նախագահի պաշտոնի համար և չենք աջակցի իսլամիստական կուսակցությունների առաջադրած թեկնածուներից ոչ մեկին»,- մեջբերում է գործակալությունը կազմակերպության առաջնորդ Մուհամմադ Բադիի խոսքերը:
Եգիպտոսի «Մուսուլման եղբայրների» առաջնորդը ակնարկել է բոլոր մրցակից շարժումներին, որ երկրի առաջատար քաղաքական ուժը պատրաստ է իշխանությունը կիսել այլ քաղաքական ուժերի հետ: Կահիրեում Բադիի հայտարարությունը գնահատում են որպես ուղերձ աշխարհիկ կուսակցություններին, որոնք վախենում են Եգիպտոսի «իսլամականացումից»:
«Մուսուլման եղբայրները» դեռ անցած տարվա գարնանը հայտարարել էին, որ չեն մասնակցի նախագահական ընտրություններին:
2012 թ. հունվարին ավարտված խորհրդարանական ընտրություններում «Մուսուլման եղբայրները» հաղթանակ տարան՝ հավաքելով ընտրողների ձայների 47%-ը:
Գալիք կիրակի Եգիպտոսում մեկնարկում են խորհրդարանի Գերագույն պալատի՝ Խորհրդատվական խորհրդի ընտրությունները, որոնցում նույնպես «Մուսուլման եղբայրները», ամենայն հավանականությամբ, կստանան եգիպտացիների աջակցությունը:
