Իրանական Fars News լրատվական գործակալության փոխանցմամբ՝ Մեծ Բրիտանիայի արտգործնախարար Ուիլյամ Հեյգը ԵՄ-ի երկրներին կոչ է արել խստացնել Իրանի նկատմամբ պատժամիջոցներն ու չնահանջել այդ հարցում.
«ԵՄ-ի անդամ երկրները պետք է հաշվի առնեն բոլոր մանրամասներն Իրանի միջուկային ծրագրի լուծման համար։ ԵՄ-ի երկրները մոտեցրել են իրանական նավթի ներկրման վրա պատժամիջոցներ սահմանելու հարցում իրենց մոտեցումները, սակայն դեռևս կոնկրետ պայմանավորվածություն չկա, թե երբ կսահմանվի բեռնարգելքը։
Ես հավատում եմ, որ հաջորդ շաբաթ Բրյուսելում կայանալիք նիստում կընդունվի այդ որոշումը։ Մենք չպետք է իրանական սպառնալիքների պատճառով հետ կանգնենք պատժամիջոցներ սահմանելուց։ Գնալով ավելի է աճում այն մտավախությունը, որ Իրանի միջուկային ծրագիրը ձեռք է բերում ռազմական բնույթ»։
Հեյգը հավելել է, որ իրենք կողմ չեն Իրանին ռազմական հարված հասցնելուն, սակայն ձեռնարկելու են բոլոր հնարավոր տարբերակները նրա միջուկային ծրագրի լուծման համար։
Հիշեցնենք, որ Հեյգի հիշատակած բրյուսելյան նիստը կայանալու է հունվարի 23-ին։
