Հունվարի 16-ին Արտակարգ իրավիճակների նախարարությունում տեղի է ունեցել ԱԻՆ ղեկավար կազմի ամենշաբաթյա խորհրդակցությունը, որը վարել է ԱԻ նախարար Արմեն Երիցյանը։
Նախարարին ներկայացվել է ԱԻՆ Փրկարար ծառայության նոր կառուցվածքի նախագիծը։ Առաջիկա օրերին Փրկարար ծառայության նոր կառուցվածքի մասին որոշման նախագիծը կներկայացվի Կառավարություն։
Նախարար Երիցյանը ուշադրությունը հրավիրել է հատուկ խմբերի` կինոլոգների, սակրավորների, պայթեցնողների, ստեղծման ու զարգացման կարևորությանը, ինչպես նաև մարզերի հետ աշխատանքների շարունակական ակտիվացմանը։
Նախարարին զեկուցվել է, որ սկսվել է ԱԻՆ աշխատակազմի առաջին բուժօգնության հմտությունների ուսուցումը։ Նախարար Երիցյանը կարևորել է նման ուսուցման կազմակերպումը, նշելով, որ առաջին բուժօգնության դասընթացներ պետք է անցնեն Նախարարության բոլոր աշխատակիցները` սկսած Նախարարից։
Նախարարին զեկուցվել է, որ առաջիկա երկու օրերին սպասվում է առավելապես առանց տեղումների եղանակ, սակայն արդեն հունվարի 18-ին`օրվա երկրորդ կեսից սպասվում է ձյուն, ինչպես նաև օդի ջերմաստիճանի նվազում։
Արդեն սկսվել է ԱԻՆ ստորաբաժանումների տարեկան հաշվետվությունների ամփոփումը, և փետրվարի սկզբին Նախարարությունը պատրաստ կլինի ներկայացնելու վերջնական հաշվետվությունը։
Հունվարի 20-ին անցյալ տարվա աշխատանքները կամփոփի Լեռնային Ղարաբաղի Փրկարար ծառայությունը։ Գործընկերների տարեկան հաշվետվության ներկայացմանը կմասնակցի նաև ՀՀ Արտակարգ իրավիճակների նախարարության պատվիրակությունը` ԱԻՆ աշխատակազմի ղեկավար Հ. Հակոբյանի գլխավորությամբ։
