Հունվարի 12-ին Al-Jazeera ալիքով ցուցադրվել է ռեժիսոր Սյուզան Խարդալյանի «Տատիս դաջվածքները» (Grandma’s Tattoos) ֆիլմը։ Սա առաջին դեպքն է, որ արաբական այս հեռուստաալիքով հայերեն խոսք է հնչում: Վավերագրական ֆիլմը ցեղասպանության մասին է: Այն ցուցադրվելու է ամեն օր՝ մինչև չորեքշաբթի օրը:
Ֆիլմը կարելի է դիտել Al-Jazeera-ի անգլալեզու թողարկումով` առցանց:
Լիբանանահայ ռեժիսոր Սյուզան Խարդալյանի այս աշխատանքի մասին վաղուց էր խոսվում, սակայն անակնկալ էր ֆիլմի պրեմիերայի ցուցադրումն նման հեղինակավոր ալիքով: Ֆիլմը հետաքրքիր է նրանով, որ ազգային ողբերգությունը ներկայացվում է անձնական տեսանկյունից` ռեժիսորի տատի խորհրդավոր դաջվածքների պատմության վերծանման միջոցով։ Այդ պատմությունը, որ Սյուզանի մեծ մայրը և նրա նման հազարավոր հայ աղջիկներ գաղտնի են պահել, ռեժիսորը բացահայտում և հանդիսատեսին է ներկայացնում մեծ զգուշությամբ և անկեղծությամբ:
Դաջվածքների պատմությունը Հայոց ցեղասպանության քիչ հայտնի էջերից է: Շվեդիայում ապրող և ստեղծագործող հայ ռեժիսորն ազգային ողբերգության այդ դրվագը ներկայացնելու համար «ուղևորություն է կատարում»՝ այցելելով Լիբանան, Սիրիա, Հայաստան, ԱՄՆ:
Ֆիլմի տևողությունը 47 րոպե է, թեև Al-Jazeera-ում կա նաև դրա կարճ տարբերակը:
