Պետք է սպասել և տեսնել` ինչպես կիրականացնի իր առաքելությունը Բարձրաստիճան պաշտոնատար անձանց էթիկայի հանձնաժողովը: «Առաջին լրատվական»-ի հետ զրույցում նման տեսակետ հայտնեց «Թրանսփարենսի ինթերնեշնլ» (ԹԻ) հակակոռուպցիոն ՀԿ-ի գործադիր տնօրեն Վարուժան Հոկտանյանը`խոսելով երեկ ստեղծված Բարձրաստիճան պաշտոնատար անձանց էթիկայի հանձնաժողովի շուրջ:
Նրա նշեց, որ գոյություն ունեցող հինգ հոգանոց հանձնաժողովը չի կարողանա ապահովել այն հարցերի լուծման շրջանակը, որը ծրագրված է:
«Իմ տեղեկություններով, դեռ քարտուղարություն պետք է ստեղծվի, հինգ հոգանոց կազմով չեն կարողանա այն աշխատանքն իրականացնել, որը ծրագրել են: Բնական է` պետք է բավականին մեծ քանակության կադրերով համալրվեն»,- ասաց Վարուժան Հոկտանյանը` հավելելով, որ իրավասությունների շրջանակում է հայտարարագրերի ստուգումը, սակայն, ըստ նրա, տարիներ շարունակ Պետեկամուտների կոմիտեն պետք է իրականացներ այդ գործառույթը, որը չարեց: Նա մանրամասնեց, որ այդ հայտարարագրերը պետք է ստուգվեին, այսինքն` ճշտվեին դրանց իսկությունը, տվյալների ճշգրտությունը, իսկ եթե դա մի ամբողջ Պետեկամուտների կոմիտե չկարողացավ անել, բնականաբար հինգ հոգանոց խումբը, չի կարողանա անել:
Գնահատելով գաղափարը`նա ասաց, որ շատ լավ գաղափար է այսպիսի հանձնաժողովի ստեղծումը, այն դեպքում, երբ դա առաջարկվել էր միջազգային կազմակերպությունների կողմից: Սակայն Վարուժան Հոկտանյանը մտավախություն հայտնեց, որ Հայստանում, ինչպես շատ օրենքներ, սա նույնպես թղթին կմնա:
Հիշեցնենք, որ ստեղծվել է Բարձրաստիճան պաշտոնատար անձանց էթիկայի հանձնաժողով: Հանձնաժողովի անդամներ են նշանակվել Ազգային ժողովի նախագահի, վարչապետի, Սահմանադրական դատարանի նախագահի, Վճռաբեկ դատարանի նախագահի և գլխավոր դատախազի առաջարկած թեկնածուները: Հանձնաժողովի առաքելությունը երկրում գործող հանրային ինստիտուտների նկատմամբ հասարակության վստահության բարձրացումն է և արդար համակարգի ներդրումը:
