Ազգային կինոկենտրոնում հիմա հետարտադրական վիճակ է: Մի քանի ֆիլմեր տարեվերջին դրվել են փորձագետների քննարկմանը: Ֆիլմերի նախագծեր կան, որոնց սցենարների վրա դեռ պետք է աշխատել: Արդեն հունվարին կհաստատվեն այն բոլոր ֆիլմերը, որոնք նախատեսված են նկարահանել 2012թ.: Այս մասին «Առաջին լրատվական»-ի հետ զրույցում տեղեկացրեց Հայաստանի ազգային կինոկենտրոնի մամլո քարտուղար Ռուզան Բագրատունյանը:
Հայաստանի ազգային կինոկենտրոնը պատրաստվում է մարտին կայանալիք ազգային կինոյի մրցանակաբաշխությանը, քանի որ փետրվարին Ալ. Սպենդիարյանի անվան օպերայի ու բալետի ազգային ակադեմիական թատրոնի դահլիճը զբաղված է: Մեզ հետ զրույցում նա տեղեկացրեց, որ մրցանակի էսքիզի մրցույթն ավարտվել է և ընտրվել է շատ հետաքրքիր արձանիկ` պատվանդանով, որի վրա ձեռքի երկու մատների`բթամատի ու ցուցամատի միացություն կա, որը ֆիլմում կոչվում է «հայակ»: «Մատները կարծես կադր են փնտրում: Էսքիզը բոլորը հավանեցին, հանձնաժողովը տվեց իր համաձայնությունը, ու հիմա այն պատրաստման փուլում է»,- տեղեկացրեց Ռ. Բագրատունյանը` հավելելով, որ մրցանակաբաշխությանը ընտրվել է 80-90 ֆիլմ:
Հարցին` ի՞նչ ֆինանսական միջոցներով են նկարահանվում ֆիլմերը, կա՞ արդյոք պետական աջակցություն, վերջինս պատասխանեց, որ 90 տոկոսով հիմնականում ֆինանսավորվում են դեբյուտներն ու ուսանողական կարճամետրաժ ֆիլմերը` 1.5, 1,8 միլիոն դրամով: Մնացածը համատեղ արտադրության ֆիլմեր են: «Օրինակ՝ եթե մի նախագիծն արժե 100 հազար դոլար, պետությունն աջակցում է ֆիլմին մի որոշ տոկոսով` ասենք 20-30 տոկոսով, ինչը համարվում է պետական աջակցություն, դա արտադրություն չէ»,- հայտնեց մամլո խոսնակը` հավելելով, որ գումարի մնացած մասը պետք է հայթայթի տվյալ ֆիլմարտադրողը, ինչն ավելի է հեշտանում պետական աջակցության պայմաններում:
Հավելենք, որ 2011թ. Ազգային կինոկենտրոնին ֆինանսական աջակցություն է տրամադրում պետությունը: Կինոկենտրոնին «Կինեմատոգրաֆիա» ծրագրի համար տրամադրվել է 401,378,8 հազար դրամ, այդ թվում` խաղարկային կինոնկարների արտադրության համար տրվել է 286,410,7 հազար դրամ, մուլտիպլիկացիոն կինոնկարների արտադրության համար` 112,096,6 հազար դրամ:
Հայաստանի ազգային կինոկենտրոնը կինոարվեստի բնագավառում պետական մշակութային քաղաքականություն իրականացնող կազմակերպություն է, որը շարունակում է հայկական կինոավանդույթները, պահպանում, տարածում և զարգացնում հայկական կինոարվեստը:
