Թուրքական Cihan լրատվական գործակալության փոխանցմամբ՝ Թուրքիայի նախագահ Աբդուլլահ Գյուլն անդրադարձել է Ֆրանսիայի Ազգային ժողովի կողմից Հայոց ցեղասպանության հերքումը քրեականացնող օրինագծի ընդունմանը և հայ-թուրքական հարաբերությունների կարգավորմանը.
«Այդ թեման նախկինում էլ է քննարկվել Ֆրանսիայում։ Ներկայումս այն նորից քննարկվեց և ընդունվեց։ Ֆրանսիայի նախագահ Նիկոլա Սարկոզին «աններելի» սխալ է գործել։ Այդ քայլը չի տեղավորվում մեր ուղեղում։ Սարկոզին դրան գնացել է փոքրիկ քաղաքական հաշվարկների պատճառով։ Հուսով եմ, որ այդպիսի «սխալներն» այսուհետ չեն կրկնվի։
Հայաստանի հետ բանակցություններ սկսելուց առաջ մենք եկանք այն եզրակացության, որ պետք է քննարկել հայ-թուրքական հարաբերությունների կարգավորման հարցը։ Այդ մասին մենք խորհրդակցություններ անցկացրեցինք Ադրբեջանի հետ։ Մենք բոլորի կողմից դրական խոսքեր լսեցինք այդ կապակցությամբ (հիշեցնենք, որ ադրբեջանական կողմն ամենաբարձր մակարդակով հայտարարեց, որ եթե Անկարայի ու Երևանի միջև երկխոսությունը հաջողությամբ ավարտվի, ապա Ադրբեջանը կարող է վերանայել Թուրքիայի հետ իր հարաբերությունների բնույթը.– 1in.am)։
Ներկայիս ստատուս-քվոն ձեռնտու չէ ոչ մեկին. ո՛չ Թուրքիային, ո՛չ Հայաստանին, ո՛չ Ադրբեջանին։ Այս իրավիճակից դուրս գալու ելքը հայտնի է։ Դժբախտաբար, դա տեղի չի ունենում»։
Գյուլը հավելել է, որ ինչ էլ ուզում է՝ ասեն, Թուրքիան այս տարածաշրջանի ամենաուժեղ երկիրն է։
