Սուրբ Ծնունդի նախօրեին Հյուսիսային Ամերիկայի օդատիեզերական պաշտպանության միացյալ ղեկավարությունը (NORAD), ավանդույթի համաձայն, սկսելու է հետևել Սանտա Կլաուսի ուղևորությանը ողջ մոլորակով մեկ: Այս մասին հայտնում է Newsru.com կայքը:
Նրանք, ովքեր ցանկանում են տեղեկություններ ստանալ Սանտա Կլաուսի գտնվելու վայրի մասին, կարող են այցելել www.noradsanta.org կայքը:
Կոլորադո նահանգում տեղակայված «Փեթերսոն» օդային բազայից NORAD-ի շտաբը սկսելու է հետևել Սանտայի և նրա օգնական Ռուդոլֆի ուղևորությանը:
Սանտայի ուղևորությանը հետևելու ավանդույթը մեկնարկել է 1955 թվականից, երբ ամերիկյան թերթերից մեկում հայտնվեց հայտարարություն. այն պարունակում էր հեռախոսահամար, որին զանգելու դեպքում կարելի էր «խոսել Սանտայի հետ»: Սակայն հայտարարության մեջ մի վրիպակ կար. երեխաները զանգում էին մի հեռախոսահամարի, որն իրականում ԱՄՆ հակաօդային պաշտպանության հրամանատարության շտաբ-բնակարանի համարն էր (NORAD-ի նախորդը): Դրանից հետո՝ 1958 թվականին, զինվորականներն իրենց վրա վերցրին ամեն տարի Սանտա Կլաուսի ճամփորդությունների մասին լուրեր հաղորդելու պարտականությունը:
Նախկինում Սանտայի տեղաշարժերի մասին հնարավոր էր տեղեկանալ միայն զանգի միջոցով, իսկ 1998 թվականից Սանտայի ճանապարհորդություններին կարելի է հետևել համացանցի միջոցով: Այժմ նրա քայլերին կարելի է հետևել նաև Google-ի, ինչպես նաև Facebook և Twitter սոցցանցերի օգնությամբ:
