Այսօր ՌԴ դեսպանատան մոտ տեղի ունեցավ ակցիա` ընդդեմ ՌԴ Պետդումայի ընտրությունների:
Մի խումբ երիտասարդներ համախմբվելով սոցցանցերում որոշել են կազմակերպել ակցիա՝ ընդդեմ ՌԴ Պետդումայի ընտրությունների, որը նրանց համոզմամբ կեղծված է:
«Առաջին լրատվական»-ի հետ զրույցում ակցիայի մասնակից Անտոն Իվշենկոն նշեց, որ իրենց պահանջն է հարգել յուրաքանչյուր քաղաքացու քվեն և քվեարկելու իրավունքը: Նա նաև չբացառեց, որ ազատ և արդար ընտրությունների դեպքում կհաղթեր «Եդինայա Ռոսիա» կուսակցությունը, սակայն նման արդյունք կուսակցությունը չէր կարող ունենալ:
Բողոքի ակցիան նշանակալից էր նրանով, որ կազմակերպիչները ներկայացրեցին բեմադրություն: Երիտասարդները «ընտրաարկղ» գրությամբ թուղթը ամրացրեցին աղբարկղին և սկսեցին կազմակերպել քվեարկություն: Քվեարկության մասնակիցները քվեարկում էին և իրենց քվեաթերթիկը գցում աղբարկղը: Այս բեմադրությամբ նրանք փորձեցին ապացուցել, որ ՌԴ Պետդումայի ընտրությունների ժամանակ քաղաքացիների մեծամասնության քվեն հայտնվել է «աղբարկղում»:
Ակցիայի մասնակիցներից մեկը մտավախություն հայտնեց, որ ՌԴ Պետդումայի ընտրությունների սցենարը կկրկնվի նաև Հայաստանում:
