Հայաստանում գազի հնարավոր թանկացման վերաբերյալ էներգետիկայի և բնական պաշարների նախարար Արմեն Մովսիսյանը խուսափողական պատասխան տվեց`«գազի գինը չի բարձրանա, եթե չբարձրանա»: Իսկ թե ինչ կլինի դե ֆակտո, ըստ նախարարի, ցույց կտա կյանքը:
Որքանո՞վ է հնարավոր գազի գնի բարձրացում, նկատի ունենալով, որ ռուսական կողմը մշտապես հայտարարել է, որ Հայաստանի համար գազի գինը պետք է հավասարվի միջազգային գներին, և եթե անգամ ռուսական կողմը թանկացնի գազի գինը հնարավո՞ր է դա կոմպենսացվի «ՀայՌուսգազարդի» մարժայի հաշվին, որպեսզի նախընտրական շրջանում բնակչությանը «չանհանգստացնեն», այս հարցը «Առաջին լրատվական»-ն ուղղեց ԲՀԿ պատգամավոր, ԱԺ տնտեսական հարցերի մշտական հանձնաժողովի փոխնախագահ Վարդան Բոստանջյանին.
«Ռուսական կողմը որպես խաղաքարտ կարող է օգտագործել գազի միջազգային գները, բոլոր պարագաներում կարող է անհրաժեշտություն ծագել Հայաստանի համար գազի գները հավասարեցնելու միջազգային գներին: Դա կախված է նրանից, թե ինչքան ցանկություն կլինի, և հնարավոր է նաև կոմպենսացվի «ՀայՌուսգազարդի» շահույթների միջոցով, բայց դա սահման ունի և չի կարող շատ բարձրանալ: Եթե շատ բարձրանա, մենք պետք է պարտավորված լինենք վճարել ավելի թանկ»:
Վ. Բոստանջյանը նաև նկատեց, որ ամեն դեպքում ՀՀ-ն Հավաքական անվտանգության պայմանագրի կազմակերպության անդամ է, դա քաղաքական գործոն է, բայց այդ քաղաքական գործոնն ունի կարևոր նշանակություն այն առումով, որ այդ կազմակերպության մեջ մտնող բոլոր երկրների համար ավելի մատչելի, ավելի տանելի պետք է լինեն հատկապես գազի նման ռազմավարական հումքի համար վճարելիք չափերը:
«Բոլոր դեպքերում մենք չունենք այն ճոխ ու մեծ հնարավորությունները, որ միջազգային գներով շարժվենք, և կարծում եմ, որ Ռուսաստանը ինչպես նախորդիվ, այնպես էլ հաջորդիվ, որպես ռազմավարական ընկեր և որպես ՀԱՊԿ երկիր, Հայաստանի համար երևի չստեղծի անտանելի վիճակներ»,- ասաց Վ. Բոստանջյանը:
