Իրանական IRNA լրատվական գործակալության փոխանցմամբ, Իրանը տիեզերագնացների խումբ է հավաքում։ Իրանցի տիեզերագնացների առաջին թիմը ձևավորված կլինի մինչև 2012 թվականի մարտ։ Այս մասին հայտարարել է Իրանի տիեզերական հետազոտությունների կենտրոնի ղեկավար Մուհամմադ ալ-Իբրահիմին։
Վերջինիս խոսքերով, իրանցի առաջին տիեզերագնացները հավաքագրվելու են կործանիչ ինքնաթիռների օդաչուներից. «Ներկայումս մենք բանակցություններ ենք վարում մի շարք երկրների հետ, որոնք նախապատրաստության հարցում կարող են օգնել մեր տիեզերագնացների ապագա թիմին։ Այդ երկրների թվում են Չինաստանն ու Ռուսաստանը։
Երբ որ իրանցի տիեզերագնացների թիմի ձևավորումն ավարտվի, ապա այն կուղարկվի տվյալ երկրներ՝ նախապատրաստական կուրս անցնելու համար»։
Հիշեցնենք, որ օրեր առաջ Իրանի Տիեզերական գործակալության ղեկավար Համիդ Ֆազելին հայտարարեց, որ Իրանը մերձկասպյան Մազանդարան նահանգում հիմնելու է Տիեզերական հետազոտությունների կենտրոն։ Ակնկալվում է, որ Իրանն առաջին տիեզերագնացին տիեզերք կուղարկի մինչև 2017 թվականը։
