Այսօր՝ դեկտեմբերի 10-ին, տեղի կունենա Լուսնի ամբողջական խավարում. խավարումը կերևա Հյուսիսային Ամերիկայում, Ասիայի կենտրոնական և արևելյան հատվածներում, Ավստրալիայում և Նոր Զելանդիայում, իսկ Հայաստանում Լուսնի խավարումը կերևա մասնակի: «Առաջին լրատվական»-ի հետ զրույցում այս մասին ասաց Հայկական աստղագիտական ընկերության համանախագահ, Բյուրականի աստղադիտարանի առաջատար գիտաշխատող Արեգ Միքայելյանը՝ հավելելով, որ մասնակի խավարմանը, բացի Հայաստանից, կարող են ականատես լինել նաև Եվրոպայում և Աֆրիկայում:
«Հնարավոր է, որ ամպամածության պայմաններում Հայաստանում Լուսնի խավարումն ընդհանրապես չերևա, բայց դեռ ժամանակ կա, եթե երկինքը մինչև գիշեր բացվի, գուցե նաև կարողանանք հետևել այդ երևույթին»,- ասաց նա:
Արեգ Միքայելյանի խոսքով, Լուսնի խավարում դիտվում է այն ժամանակ, երբ Լուսինը հայտնվում է երկրի ստվերի մեջ` Երկրի և Արեգակի ուղիղ գծի հետևում, այսինքն՝ Երկրի հակադիր կողմում, և Արեգակի կողմից լուսավորված չի լինում: «Լուսինը մենք լուսավորված տեսնում ենք արևի լույսի շնորհիվ: Երբ Լուսինը հայտնվում է ստվերում, Երկրի մթնոլորտի միջով թափանցելով՝ որոշ լուսավորություն հասնում է, և Լուսինը կարմրավուն՝ բավական գեղեցիկ գույն է ստանում: Սովորաբար նման խավարումներ լինում են տարեկան 2-3 անգամ: Այս տարի Լուսնի մասնակի խավարում եղել էր նաև հունիսի 15-ին»,- նկատեց աստղագետը:
Նա նաև տեղեկացրեց, որ Լուսնի խավարումը մարդկանց առողջական վիճակի վրա որևէ բացասական ազդեցություն չի ունենա:
