Բրիտանական Bell Pottinger Group փիար-գործակալությունը ընդունել է, որ իր հաճախորդների շահերի շրջանակներում վերախմբագրել է «Վիքիպեդիայի» մի շարք հոդվածներ:
Ինչպես հայտնում է The Independent թերթը, «Վիքիպեդիայի» հոդվածներում փոփոխությունները նկատվել են անկախ խմբագիրների կողմից, որոնք պահանջել են հետաքննություն անցկացնել: Հետաքննության արդյունքում պարզվել է, որ Bell Pottinger փիար-գործակալության աշխատակիցները տարբեր հաշիվների միջոցով ավելացրել են դրական փաստեր և հեռացրել են բացասականները իրենց հաճախորդների էջերից:
Cyber Security կայքը գրում է, որ դրանից հետո հոդվածի վրա թողնում էին Edit Protection նշանը, որ նշանակում էր՝ հոդվածն արդեն ավարտուն է և հետագա խմբագրման կարիք չունի:
Bell Pottinger գործակալությունը ընդունել է հոդվածները խմբագրելու փաստը, սակայն հայտարարել է, որ իր աշխատակիցները ոչ մի անօրինական քայլ չեն կատարել: Սակայն «Վիքիպեդիայում» ասում են, որ կայքի օրենքներով արգելված է հոդվածը խմբագրել անձնական կամ գործնական շահերից ելնելով, ինչպես նաև արգելված է գովազդային նյութեր տեղադրել: «Վիքիպեդիայի» հիմնադիր Ջիմի Ուելսը սա անվանել է «էթիկական կուրություն»:
«Այս ընկերությունը իրականացրել է փիար-գործակալությունների կամ լոբբիստական ընկերությունների համար ամենասարսափելի մեղքը. նրանց այս արարքը վատ է անդրադարձել հաճախորդների վրա և նույնիսկ ոչ մի շահույթ չի բերել նրանց»,- ավելացրել է Ուելսը:
Այս պահին հաշիվները, որոնց միջոցով Bell Pottinger-ը խմբագրել էր «Վիքիպեդիան», արգելափակված են: Անկախ խմբագիրները շարունակում են բոլոր հոդվածների ստուգումները:
Նշենք, որ Bell Pottinger գործակալությունը համարվում է Մեծ Բրիտանիայի խոշորագույն լոբբիստական ընկերություններից մեկը:
