Լիբանանահայ համայնքը հպարտ է իր երկրի նախագահ Միշել Սուլեյմանով և վստահ, որ Հայաստան կատարած նրա այցից հետո երկու երկրների միջև կապերն ավելի կամրապնդվեն: «Առաջին լրատվական»-ի հետ զրույցում նման համոզմունք հայտնեց Լիբանանում լույս տեսնող «Զարթոնք» թերթի խմբագիր Պայծիկ Գալայջյանը:
«Սա մեր համար շատ նշանակալից այց էր նախ այն պատճառով, որ լիբանանահայությունը միշտ հպարտացել է իր նախագահով: Սուլեյմանի այցը Հայաստան նշանակալից է մի շարք առումներով: Նախ՝ իմացանք, որ նա Հայոց ցեղասպանության զոհերի հուշահամալիր՝ Ծիծեռնակաբերդ է այցելել, ինչով շատ հպարտանում ենք: Նա գիտի նահատակության իմաստը, Լիբանանը քաղաքացիական կռիվների ընթացքում շատ նահատակներ է տվել: Լիբանանը «նահատակ» բառի իմաստը շատ է արժևորում, և՝ ուրախ ենք, որ մեր նախագահն արժևորեց հայոց պատմությունը»,- ասաց նա:
Ամփոփելով՝ Պայծիկ Գալայջյանը նշեց, որ պաշտոնական այցելություններից զատ, Հայաստանն ու Լիբանանն առանց այդ էլ բարեկամական հարաբերությունների մեջ են, իսկ երկու երկրների ղեկավարների փոխայցելություններն էլ ավելի կամրապնդեն երկկողմ շփումները:
Նշենք, որ դեկտեմբերի 8-ին Սերժ Սարգսյանի հրավերով պաշտոնական այցով Հայաստան է ժամանել Լիբանանի Հանրապետության նախագահ Միշել Սուլեյմանը կնոջ՝ Վաֆաա Սուլեյմանի հետ:
