Կենտրոնական բանկի խորհուրդն այսօր կայացած նիստում, որը վարում էր ԿԲ նախագահ Արթուր Ջավադյանը, հաստատել է «Ներդրումային ֆոնդերի զուտ ակտիվների արժեքի հաշվարկման կարգը» կանոնակարգ 10/04-ը, «Ներդրումային ֆոնդերի ներդրումային սահմանափակումները» կանոնակարգ 10/10-ը, «Հարկվող շահույթի որոշման համար ներդրումային ֆոնդերի զուտ ակտիվների արժեքի հաշվարկման կարգը» կանոնակարգ 10/14-ը, ինչպես նաև ՀՀ ԿԲ 2012-2013 թթ. հուշադրամների թողարկման ծրագրով նախատեսված «Հայաստանի վանքերը և եկեղեցիները» շարքի «Սբ. Էջմիածնի Մայր Տաճար», «Գնդեվանք» և «Նորավանք» հուշադրամների դիմերեսի և դարձերեսի ուրվագծերը:
Խորհրդի որոշմամբ փոփոխություններ և լրացումներ են կատարվել «Բանկերի և օտարերկրյա բանկերի մասնաճյուղերի գրանցումն ու լիցենզավորումը, բանկերի մասնաճյուղերի և ներկայացուցչությունների գրանցումը, բանկերի և օտարերկրյա բանկերի մասնաճյուղերի ղեկավարների որակավորումը և գրանցումը» կանոնակարգ 1-ում, «Բանկերի, վարկային կազմակերպությունների, ապահովագրական ընկերությունների, ապահովագրական բրոքերների, ներդրումային ընկերությունների, ներդրումային ֆոնդերի կառավարիչների, Կենտրոնական դեպոզիտարիայի և դրամական փոխանցումներ իրականացնող վճարահաշվարկային կազմակերպությունների կողմից տեղեկությունների հրապարակումը» կանոնակարգ 8/03-ում, «Վարկային կազմակերպությունների գործունեության կարգավորումը, վարկային կազմակերպությունների գործունեության տնտեսական նորմատիվները» կանոնակարգ 14-ում, «Վարկային կազմակերպությունների հաշվետվությունները, դրանց ներկայացումը և հրապարակումը» կանոնակարգ 15-ում և «Պետական արժեթղթերի հաշվառման և հաշվարկների համակարգում կիրառվող հաշվեհամարների կոդավորման» կարգում:
ԿԲ հասարակայնության հետ կապերի ծառայությունից «Առաջին լրատվական»-ին հայտնեցին, որ խորհուրդը որոշել է «ՀԱՅԲԻԶՆԵՍԲԱՆԿ» ՓԲԸ-ին տրամադրել «ՔՈՅՆՍԹԱՐ ՄԱՆԻ ԹՐԵՆՍՖԸՐ» արտասահմանյան վճարահաշվարկային համակարգում մասնակցության թույլտվություն: «Եվրո Կրեդիտ Կապիտալ» ՍՊԸ-ին, «ԴԱՅՄՈՆԴ ԿՐԵԴԻՏ» ՍՊԸ-ին և անհատ ձեռնարկատեր Նարինե Արզումանյանին տրամադրվել են գրավատան կազմակերպման լիցենզիաներ: «Ոսկե Լումա» ՍՊԸ-ի գրավատան լիցենզիան և Ա/Ձ Ալբերտ Պապոյան փոխանակման կետի արտարժույթի առուվաճառքի թիվ 236 լիցենզիան վերաձևակերպվել են: Ուժը կորցրած է ճանաչվել «ԼՕՄԲ-ՖԻՆ» ՍՊԸ-ի գրավատան կազմակերպման թիվ ԳԳ-Ե 188 լիցենզիան:
