Ամեն կողմից բնապահպանական օրգանիզմը ծակում և քայքայում են: «Առաջին լրատվական»-ի հետ զրույցում նման տեսակետ հայտնեց բնապահպանական փորձագետ Արման Վերմիշյանը`խոսելով վերջին օրերին հանրային մեծ քննարկում ստացած բնապահպանական խնդիրների շուրջ:
Նա տեղեկացրեց, որ բնապահպանական քաղաքացիական նախաձեռնությունները ցանկանում էին համագործակցել Բնապահպանության նախարարության հետ, առաջարկություններով հանդես գալ, բայց չեն անելու, քանի որ առաջին ընթերցմամբ ընդունվել է «Շրջակա միջավայրի ազդեցության փորձաքննության մասին» օրենքի նախագիծը:
Օրինագծով սահմանվում են առավել քիչ հանրային լսումներ և մի շարք վիճահարույց դրույթներ: Ըստ Ա. Վերմիշյանի`Թռչկանը վառ օրինակ էր: «Փորձեցին շահագրգիռ անձանց փաստի առաջ կանգնեցնել, բայց մենք կանգնեցրինք փաստի առաջ ՀԷԿ կառուցողներին: Դա պետք է անենք բոլոր դեպքերում»,- մեկնաբանեց բնապահպանական փորձագետը`ենթադրելով, որ նոր օրենք ընդունելու նախաձեռնությունը ցույց է տալիս, որ կառավարությունը Բնապահպանության նախարարության հետ համատեղ ցանկություն չունի համագործակցելու:
Ա. Վերմիշյանը կարծում է, որ քաղաքացիական նախաձեռնությունները պետք է սկսեն իրենց լայնածավալ աշխատանքները, բողոքի ակցիաները: Նա արդեն չի զարմանում, որ Բնապահպանության նախարարության փորձաքննության ՊՈԱԿ-ը աբսուրդ որոշումներ է կայացնում: «Ո՞վ է ասել, որ Հանքավանում պետք է հանք բացել: Մենք գիտենք, թե ինչ թույլտվություններ է տալիս ՊՈԱԿ-ը: Բնապահպանական ոլորտում փորձաքննության ՊՈԱԿ-ն այն կառույցն է, որ իրավասու է նման անհեթեթ ծրագրեր հաստատել»,- նշեց բնապահպանական փորձագետը` համոզված, որ «Պահպանենք Թռչկանի ջրվեժը» քաղաքացիական նախաձեռնությունը շատ արդյունավետ կաշխատի:
Արման Վերմիշյանի համոզմամբ, այս բնապահպանական սխալները միանշանակ տանում են կործանման: Նա այս երևույթը համեմատեց քաղցկեղ հիվանդության հետ: «Հարուցիչը մտնում է օրգանիզմ, սկսում սնվել այդ օրգանիզմով և կործանել այն: Հետո մարդը մահանում է: Որոշ անձինք ամեն կողմից բնապահպանական օրգանիզմը ծակում և քայքայում են»,- շարունակեց Ա. Վերմիշյանը`ամփոփելով, որ այսպես շարունակել չի կարելի:
