Իտալիայի ոստիկանությունը ձերբակալել է ենթադրյալ սերիական մարդասպանի, որն աշխատել է ծերերի և միայնակների առողջարանում: Ինչպես հաղորդում է իտալական La Repubblica թերթը, հանցագործը 2008 և 2009 թթ. հաշվեհարդար է տեսել տարեց հիվանդների հետ՝ իրեն երևակայելով Աստծո ընտրյալ:
Քննիչների տվյալներով՝ 66-ամյա բուժակ Անջելո Ստացցին սպանել է առնվազն 7 մարդու՝ նրանց ներարկելով ինսուլինի մահացու չափաբաժին: Իտալական մամուլը մարդասպանին տվել է «Մահվան և Մոնտելիբրետիի հրեշտակ» անվանումը:
Դատական գործի մեջ նշվում է, որ Ստացցին «դանդաղ է սպանել իր զոհերին՝ իմունիտետն իջեցնող հոգեմետ դեղամիջոցների օգնությամբ նրանց նախապատրաստելով մահվան, և միայն դրանից հետո անցել է ինսուլինին՝ ներարկելով հսկայական, մահացու, նորման 50 անգամ գերազանցող չափաբաժին: Ներարկումները մարդկանց գցել են կոմայի մեջ, իսկ հետո հանգեցրել նրանց մահվան:
Ինքը՝ Ստացցին, հայտարարել է, թե պատահաբար չէ, որ ինքը ծնվել է դեկտեմբերի 25-ին՝ Սուրբ Ծննդյան օրը: Նա նաև պնդում է, որ «մոտ է գտնվում Աստծուն»: Սակայն քննիչներն առայժմ չեն շտապում նրա «աստվածային» առաքելությունները համարել սպանության դրդապատճառ:
Մահվան հրեշտակի տան խուզարկության ժամանակ հայտնաբերվել է բավական մեծ քանակությամբ ինսուլին:
Նշենք, որ մարդասպանին հաջողվել է հայտնաբերել միայն այդ հանցագործություններից մեկ տարի անց:
