News Georgia-ի փոխանցմամբ՝ վրացի ընդդիմադիր միլիարդատեր Բիձինա Իվանիշվիլին այսօր հայտարարել է, որ Ռուսաստանի հետ հարաբերությունների կարգավորումը հեշտ չի լինելու.
«Իշխանության գալուց անմիջապես հետո իմ պլանների մեջ է մտնում Ռուսաստանի հետ հարաբերությունների կարգավորումն ու դեպի ռուսական շուկա վրացական ապրանքի վերադարձը, ինչը հեշտ չի լինելու։ Ես պատրանքներ չեմ տածում, թե այդ ամենը կարող է տեղի ունենալ 5 րոպեում։ Ընդ որում, շուկայի բացումը չպետք է հետին պլան մղի մյուս կարևոր հարցերը։
Հայտնի չէ, թե որքան ժամանակ կպահանջի Ռուսաստանի հետ հարաբերությունների կարգավորումը, սակայն վրացական ներկայիս իշխանությունների օրոք դա տեղի չի ունենա։ Մենք մեր դիրքերն առաջ կտանենք մեռյալ կետից, սակայն մենք չգիտենք, թե դա որքան ժամանակ կպահանջի, և որ ուղղությամբ կզարգանան իրադարձությունները։
Թեև Ռուսաստանի հետ հարաբերությունները բարդ են լինելու, այնուամենայնիվ, անհնար բան չկա։ Միայն Սաակաշվիլիի ժամանակաշրջանում է դա անհնար, ինչի պատճառով հարցը մնացել է սառեցված վիճակում»։
Հիշեցնենք, որ Իվանիշվիլին այս տարվա հոկտեմբերի 5-ին հայտարարեց, որ պատրաստվում է քաղաքական կուսակցություն հիմնել Վրաստանում, դրանով մասնակցել 2012 թվականի խորհրդարանական ընտրություններին, ճնշող մեծամասնությամբ հաղթել դրանցում և դառնալ վարչապետ կամ խորհրդարանի խոսնակ։
