«Օրենքում կան միջազգայնորեն թույլատրելի անհստակություններ, բայց ինչպես պարզվեց մեր երկրում կիրառման ընթացքից դրանք այդքան էլ ցանկալի չեն: Այդ անհստակությունները եվրոպական երկրներում որոշում է դատարանը, իսկ մեր երկրում այն մասերը, որոնք թողնված են դատարանի որոշմանը, ցավոք սրտի, սկսել են մտահոգիչ լինել և լրջորեն վտանգել խոսքի ազատությունը»,- «Առաջին լրատվական»-ի հետ զրույցում խոսելով զրպարտության և վիրավորանքի վերաբերյալ ՀՀ քաղաքացիական օրենսգրքի դրույթների մասին, կարծիք հայտնեց ՀՀ Մարդու իրավունքների պաշտպան Կարեն Անդրեասյանը:
Նշենք, որ Կարեն Անդրեասյանը դիմել է ՀՀ Սահմանադրական դատարան վերոնշյալ օրենքի մի շարք դրույթների հակասահմանադրականության խնդրով:
Անդրեասյանը նշեց, որ սպասում է ՍԴ որոշմանը, որով կամ կհստակեցվեն օրենքի այդ դրույթները, կամ դրանք հակասահմանադրական ճանաչելով՝ օրենքը կուղարկվի Ազգային ժողով հստակեցման:
Անդրեասյանը նկատեց, որ օրենքի բացերը տեսնելու համար պետք էր այն կիրառել, այլ բան է, որ լրագրողները ժամանակին բարձրացնում էին հնարավոր հետևանքների մասին, բայց ինքը, նույնիսկ հասկանալով դա, կարծում էր, որ նման օրենքի գոյությունն անհրաժեշտ է. «Չի կարելի ընդհանրապես անձի արժանապատվությունը չպաշտպանել, իսկ պաշտպանելուց էլ դա անել քրեական օրենսգրքի շրջանակներում»:
