Իհարկե կգա այն օրը, երբ հանրությունն, ի վերջո, կիմանա Հոկտեմբերի 27-ի ողբերգության իրական կազմակերպիչների`12 տարի առաջ Հայաստանի իշխանությունը գլխատողների անունները: «Առաջին լրատվական»-ի հետ զրույցում նման համոզմունք հայտնեց Հայաստանի լիբերալ կուսակցության նախագահ Հովհաննես Հովհաննիսյանը:
«Հոկտեմբերի 27-ի ոճրագործությունից մինչև այսօր Հայաստանը, որպես երկիր, այդպես էլ չկարողացավ վերագտնել իր ազգային-պետական պատկերը, որովհետև հասարակությանը հասցված այդ վերքն այդպես էլ չի բուժվում: Վերքը միշտ բաց կմնա, մինչև որ իրական մեղավորները չպատժվեն: Հայաստանը 12 տարի առաջ որպես երկիր կայանալու հնարավորություն էր ստացել: Այդ հնարավորությունը, սակայն, մեր ձեռքից խլեցին, և մենք հայտնվեցինք մի քաոսի մեջ, որը շարունակվում է մինչև այսօր և կշարունակվի, քանի դեռ գործում են այս իշխանությունները: Այս քաոսը շարունակվում է, խորանում է` երկրին խոշոր վնասներ հասցնելով»,- նկատեց Հովհաննես Հովհաննիսյանը` հավելելով, որ այս ամենի արդյունքում ունենք այն, ինչ ունենք:
Նրա խոսքով՝ Հայաստանի երկրորդ նախագահ Ռոբերտ Քոչարյանը Մարտի 1-ի սպանդի գնով իշխանությունը փոխանցեց Սերժ Սարգսյանին: «Հիշո՞ւմ եք, Ռոբերտ Քոչարյանի թևավոր խոսքը, որ հոկտեմբերի 27-ն «ուչաստկովիի գործ ա»: Երբ նման ողբերգությունից հետո երկրի գործող նախագահը նման գնահատական էր տալիս, այն ժամանակ արդեն պարզ էր, թե այս ամենն ուր է գնում: Բայց բոլոր խնդիրներն իսկապես կլուծվեն, եթե Հայաստանում իշխանափոխություն տեղի ունենա, երբ երկրում ժողովրդավարություն ձևավորվի, և ժողովուրդը դառնա այս երկրի տերը»,- ամփոփեց Հայաստանի լիբերալ կուսակցության նախագահը:
