Ադրբեջանական ANS PRESS-ի փոխանցմամբ՝ երեկ ՄԱԿ-ի Գլխավոր ասամբլեայում տեղի է ունեցել Արևելյան Եվրոպան ներկայացնող երկրների՝ ՄԱԿ-ի Անվտանգության խորհրդի ժամանակավոր անդամի ընտրությունները։ Իր պատմության մեջ առաջին անգամ ՄԱԿ ԱԽ-ի ժամանակավոր անդամ է ընտրվել Ադրբեջանը։
Սլովենիան հանել է իր թեկնածությունը, իսկ Ադրբեջանի օգտին քվեարկել է 155 երկիր, 24 երկիր էլ ձեռնպահ է մնացել։
Հիշեցնենք, որ հոկտեմբերի 21-ին ՄԱԿ-ի Գլխավոր ասամբլեայում տեղի ունեցած ընտրությունների 9 փուլերն ի հայտ չբերեցին Արևելյան Եվրոպան ներկայացնող Սլովենիայի ու Ադրբեջանի պայքարի հաղթողին։ ՄԱԿ-ի ԱԽ ժամանակավոր անդամ ընտրվելու համար կողմերից պահանջվում է ստանալ քվեների 2/3-ը (129 քվե)։
Ադրբեջանը ՄԱԿ ԱԽ ժամանակավոր անդամի պարտականությունների կատարմանը ձեռնամուխ կլինի 2012 թվականի հունվարի 1-ից։ Ոչ վաղ անցյալում Ադրբեջանի նախագահի աշխատակազմի հասարակական-քաղաքական հարցերի վարչության պետ Ալի Հասանովը հայտարարել էր, որ, ՄԱԿ ԱԽ մշտական անդամների հետ մեկտեղ, որոշակի կարգավիճակ ունեն նաև նրա ժամանակավոր անդամները.
«Նրանք տիրապետում են որոշակիորեն համաշխարհային քաղաքականության վրա ներազդելու մի շարք մեխանիզմների։ Աշխարհում ընթացող կարևոր իրադարձությունների մասին որոշումներ ընդունելիս և դրանք ի կատար ածելիս հաշվի է առնվում նաև ՄԱԿ-ի ԱԽ ժամանակավոր անդամների կարծիքը։
Եթե Ադրբեջանին շնորհվի ՄԱԿ-ի ԱԽ ժամանակավոր անդամի կարգավիճակ, ապա նա կարող է ՄԱԿ-ի ԱԽ մշտական անդամներին իրազեկել տարածաշրջանային քաղաքականության իրողությունների և դրանում առկա խնդիրների մասին։ ՄԱԿ-ի ԱԽ ժամանակավոր անդամ ընտրվելը դրականորեն կազդի Ադրբեջանի խնդիրների վրա»։
