Հայկական բանակում տեղի ունեցող ողբերգական իրադարձությունները Վրաստանում զարմանք են առաջացնում, սակայն վիրահայ համայնքը հակված է մտածելու, որ Հայաստանը բարեփոխումների արդյունքում մի օր կարող է կարգապահ բանակ ունենալ: «Առաջին լրատվականի» հետ զրույցում այս մասին ասաց Թբիլիսիի հայերի ասամբլեայի ղեկավար Առնոլդ Ստեփանյանը:
Նրա խոսքով՝ ցավալի է, որ հայկական զինված ուժերում դեռևս խորհրդային ժամանակներից պահպանված «դեդովշչինայի» մնացորդներ են նկատվում: «Վրացական բանակում, օրինակ, վերջին տասը տարիներին այդ խնդիրն այլևս չկա: Մենք հավատում ենք, որ հայկական բանակում ևս, անհրաժեշտ բարեփոխումներ իրականացնելուց հետո, այդ երևույթը կվերանա: Նորմալ հասարակությունը կարող է նորմալ բանակ կառուցել: Եթե նման ցանկություն լինի, այն անպայման հնարավոր է իրագործել, պարզապես հակված եմ մտածելու, որ նման ցանկություն չկա»,- նկատեց Առնոլդ Ստեփանյանը:
Նրա խոսքով՝ վիրահայ համայնքը, սակայն, իր տեղեկություններով չի պատրաստվում հայկական բանակում խաղաղ պայմաններում տեղի ունեցած ողբերգական դեպքերի կապակցությամբ բողոքի ակցիաներ կազմակերպել: «Մենք Վրաստանի քաղաքացիներ ենք և չենք կարող անգամ այս երկրում Հայաստանի դեսպանատուն դիմել` արտահայտելու մեր դժգոհությունը, բողոքի առանձին ակցիաներ ևս դժվար լինեն, պարզապես կասեմ, որ Վրաստանի հայերը վշտացած են հայկական բանակում տեղի ունեցող իրադարձություններից»,- ամփոփեց Թբիլիսիի հայերի ասամբլեայի ղեկավարը:
