Վրացական «Իմեդի» հեռուստաընկերության փոխանցմամբ՝ օրվա երկրորդ կեսին Թբիլիսիում տեղի է ունենալու «Միմինո» ֆիլմի հերոսների հուշարձանի բացման արարողությունը։ Այդ հուշարձանը ստեղծվել է 4 տարի առաջ Մոսկվայում տեղակայվելու համար, սակայն այդպես էլ չի դրվել։
Նշվում է, որ այդպիսի հուշարձան 4 տարի առաջ ստեղծվել է Սոչիում, դրանում պատկերված են ֆիլմի գլխավոր հերոսները՝ Վախթանգ Կիկաբիձեն (Վալիկո Միզանդարին), Ֆրունզիկ Մկրտչյանը (Ռուբիկ Խաչիկյան) և Եվգենի Լեոնովը (Իվան Վոլոխով)։ Թբիլիսյան հուշարձանում ավելացել է ևս մեկ ֆիգուր, որը խորհրդանշում է ֆիլմի ռեժիսոր Գեորգի Դանելիային։
Հուշարձանը բացվելու է մետրոպոլիտենի «Հավլաբար» կայարանի մոտ։
Հիշեցնենք, որ հուշարձանի հեղինակը քանդակագործ և նկարիչ, Ռուսաստանի գեղարվեստի ակադեմիայի նախագահ Զուրաբ Ծերեթելին է։ Քանդակները ոչ վաղ անցյալում բերվել են Թբիլիսի և անվերադարձ հանձնվել Վրաստանին։
