Հոկտեմբերի 14-16-ը Երևանում կընթանա «Զուգահեռների հատում» ժամանակակից արվեստի միջազգային սեմինարը, որի շրջանակում նախատեսվում են արվեստի և տեսական մի շարք քննարկումներ, դասախոսություններ, շնորհանդեսներ: Այսօր լրագրողների հետ հանդիպման ժամանակ այս մասին խոսեցին սեմինարի կազմակերպիչ, անկախ համադրող Եվա Խաչատրյանը, AICA-Հայաստանի նախագահ, անկախ համադրող, արվեստի քննադատ Նազարեթ Կարոյանը և արվեստագետ, «Արտ-լաբորատորիա» մշակութային ՀԿ նախագահ Հովհաննես Մարգարյանը:
«Իրենց փորձն ու գործունեությունը Երևանի գործիչներին կներկայացնեն Վրաստանի և Գերմանիայի ժամանակակից արվեստի գործիչները` Սոֆյա Տաբաթաձեն, Վաթո Ծերեթելին, Վիբկե Բերենսը և Բերիթ Ֆիշերը: Իրենց հերթին Հայաստանի արվեստային դաշտում կենսափորձ ունեցող մասնագետները և արվեստների «Արտ-լաբորատորիա» խումբը կներկայացնեն իրենց փորձառությունը»,- տեղեկացրեց Եվա Խաչատրյանը` հավելելով, որ միջոցառումը կայանում է Գյոթեի անվան ինստիտուտի Culture and development ծրագրի Competence Center for cultural managers ենթածրագրի շրջանակում: Ե.Խաչատրյանի փաստմամբ` սեմինարը և ժամանակակից արվեստի զարգացումը Հայաստանում որևէ ֆինանսական աջակցություն չեն ստանում պետական կառույցներից:
Նշենք, որ սեմինարի բացման արարողությունը տեղի է ունենալու «Արվարձան» մշակութային կենտրոնում, որտեղ իրենց զեկույցներով հանդես կգան արվեստի գործիչներ Ռուբեն Արևշատյանը և Նազարեթ Կարոյանը: Միջոցառումները կկայանան «Արվարձան» մշակութային կենտրոնում, Գաֆէսճեան արվեստի կենտրոնում և The Club-ում: Ինչպես տեղեկացրեցին կազմակերպիչները, մուտքն ազատ է լինելու բոլոր՝ ժամանակակից արվեստով հետաքրքրվող անձանց համար:
Համատեղ ասուլիսին ներկա Վրաստանի ժամանակակից արվեստի գործիչ Սոֆյա Տաբաթաձեն ասաց, որ արվեստի այս ճյուղը հաճախ չի հովանավորվում պետության կողմից: «Վրաստանում հիմնականում հովանավորվում են անհատների կողմից, իսկ պետությունը աջակցում է միայն մասշտաբային միջոցառումները»,- նշեց Ս.Տաբաթաձեն:
