Մայիսի 1-ին Բաքվում Եվրամիության դեսպան Մարիաննա Կույունչիչը հրավիրվել է Ադրբեջանի արտաքին գործերի նախարարություն։ Այդ մասին հայտնել են ադրբեջանական լրատվամիջոցները՝ հղելով ԱԳՆ պաշտոնական հաղորդագրությանը։ Առիթ է հանդիսացել նախօրեին Եվրախորհրդարանի ընդունած բանաձևը։
Ըստ պաշտոնական Բաքվի, այդ փաստաթուղթը «խեղաթյուրում է իրականությունը, հակասում անաչառության սկզբունքին, ինչպես նաև պետությունների ինքնիշխանությունը և տարածքային ամբողջականությունը հարգելու պարտավորությանը»։
Ադրբեջանի ԱԳՆ-ն ընդգծել է, որ Եվրախորհրդարանի «նման վարքագիծը բացասաբար է անդրադառնում տարածաշրջանում կարգավորման գործընթացին, ինչպես նաև՝ Եվրամիություն-Ադրբեջան հարաբերություններին»։
Նույն օրը Ադրբեջանի Միլլի մջելիսը քննարկել և քվեարկությամբ ընդունել է Եվրախորհրդարանի հետ համագործակցությունը կասեցնելու մասին որոշում։ Միաժամանակ Ադրբեջանը դադարեցրել է Եվրամիություն-Ադրբեջան խորհրդարանական համագործակցության կոմիտեի գործունեությանը Միլլի մեջլիսի մասնակցությունը։ Մինչև Եվրանեսթի խորհրդարանական վեհաժողովի կողմից ընթացակարգային որոշման ընդունումը «Միլլի մեջլիսը Եվրանեսթի խորհրդարանական միջոցառումներին չի մասնակցի»։
Եվրախորհրդարանի բանաձեւը ընդունվել է Եվրոպայի քաղաքական համայնքի և Եվրամիություն-Հայաստան՝ Երևանում կայանալիք գագաթաժողովից չորս օր առաջ։ Ադրբեջանի ԱԳՆ-ի արձագանքը և Եվրախորհրդարանի ու Եվրանեսթի հետ համագործակցությունը դադարեցնելու մասին Միլլի մեջլիսի որոշումը, հավանաբար, ավելի խորքային ենթատեքստ ունի, քան պաշտոնական Բաքուն է հրապարակայնացրել։
Նախկին արտգործնախարար Զուլֆուգարովը Եվրախորհրդարանի բանաձևը գնահատել է որպես ոչ միայն «հակաադրբեջանական, այլև հակաթուրքական»։ Նա վկայակոչել է Եվրահանձնաժողովի նախագահ Լյաենի դիտարկումը, որ Եվրամիությունը «չպետք է թույլ տա Եվրոպայում Ռուսաստանի, Չինաստանի և Թուրքիայի ազդեցության հաստատումը»։
Պաշտոնական Բաքուն, ամենայն հավանականությամբ, Եվրախորհրդարանի բանաձևի առիթն օգտագործում է, որպեսզի Եվրահանձնաժողովին «զգուշացնի» Հայաստանի հետ համագործակցության «անցանկալիության» մասին։ Իշխանամետ haqqin.az-ը գրել է, որ Թուրքիայի նախագահ Էրդողանը Երևան այցի հրավեր է ստացել, բայց Անկարան դեռևս այդ հարցով «վերջնական որոշում չունի»։ Բացառված չէ, որ Իլհամ Ալիևի «եվրադեմարշի» հասցեատեր է նաև Էրդողանը, որի Երևան այցը Ադրբեջանի համար «թիկունքին հարված» կլիներ։
