Բաքվում՝ Յասամալի շրջանում գտնվող Ազգային ուռուցքաբանական կենտրոնում պայթյուն է տեղի ունեցել։ Ադրբեջանի գլխավոր դատախազության մամուլի ծառայության հաղորդմամբ՝ նախաքննության ընթացքում հիմնավոր կասկածներ են առաջացել, որ 1988 թվականին ծնված Մուբարիզ Ալիևը, որը հաշվառված էր որպես ուռուցքաբանական հիվանդ, ապօրինի ձեռք է բերել և պահել պայթուցիկ սարք, որն էլ գործի է դրել կենտրոնի ճառագայթաբանական բաժանմունքում։
Ըստ պաշտոնական տվյալների՝ պայթյունի հետևանքով նա փորձել է հանրավտանգ եղանակով դիտավորությամբ սպանել բժշկի։ Խոսքը վերաբերում է բժիշկ Ասիֆ Նասիրովին։ Միջադեպի հետևանքով Մուբարիզ Ալիևը տեղում մահացել է ստացած վնասվածքներից։ Բժիշկ Ասիֆ Նասիրովն ստացել է ծանր մարմնական վնասվածքներ և հոսպիտալացվել է․ նրա վիճակը գնահատվում է ծանր։
Դեպքի վայրում աշխատել է քննչական-օպերատիվ խումբ՝ դատաբժշկական փորձագետի մասնակցությամբ։ Առգրավվել են նյութական ապացույցներ, նշանակվել է դատաբժշկական փորձաքննություն, իրականացվել են անհրաժեշտ քննչական գործողություններ։
Փաստի առթիվ Յասամալի շրջանի դատախազությունում հարուցվել է քրեական գործ՝ Ադրբեջանի քրեական օրենսգրքի 29, 120.2.4 (հանրավտանգ եղանակով սպանության փորձ) և 228.1 (պայթուցիկ նյութերի և սարքերի ապօրինի ձեռքբերում, պահում և կրում) հոդվածներով։
Ավելի վաղ հաղորդվել էր, որ պայթյունը տեղի է ունեցել կենտրոնի ճառագայթային ախտորոշման բաժանմունքի առաջին հարկում գտնվող աշխատասենյակներից մեկում։ Տեղում աշխատել են իրավապահ մարմինների աշխատակիցներ, ընթանում է քննություն։
