Ռուսաստանի արտաքին գործերի նախարար Սերգեյ Լավրովը Սոչիում կայացած Ռուսաստան-Պարսից ծոցի համագործակցության խորհուրդ ռազմավարական երկխոսության հերթական փուլի շրջանակներում հանդիպել է արաբ գործընկերների հետ՝ քննարկելով միջազգային և տարածաշրջանային, ինչպես նաև երկկողմ համագործակցությանն առնչվող հարցեր։ Այս մասին հայտնում է Ռուսաստանի արտաքին գործերի նախարարությունը։
Լավրովը հանդիպում է անցկացրել Կատարի արտաքին գործերի պետնախարար Սուլթան ալ-Մուրայխիի հետ։ Զրույցի ընթացքում մանրամասն քննարկվել են ռուս-կատարական ավանդական բարեկամական հարաբերությունների ողջ համալիրի հետագա զարգացման հեռանկարային ոլորտները:
Բացի այդ, Լավրովը հանդիպել է Քուվեյթի Պետության արտաքին գործերի նախարար Աբդ Ալլահ Ալի ալ-Յահյայի, Բահրեյնի Թագավորության ԱԳ նախարար Աբդ ալ-Լատիֆ ազ-Զայանիի, ինչպես նաև Պարսից ծոցի համագործակցության խորհրդի գլխավոր քարտուղար Ջասիմ ալ-Բուդայուիի հետ։
Հանդիպումների ընթացքում հաստատվել է փոխադարձ հանձնառությունը՝ ամրապնդելու փոխշահավետ առևտրատնտեսական, մշակութային և հումանիտար համագործակցությունը։
Նաև քննարկվել են միջազգային և տարածաշրջանային օրակարգի արդիական հարցեր՝ շեշտը դնելով պաղեստինաիսրայելական հակամարտության գոտում տիրող իրավիճակի վրա։
Պարսից ծոցի համագործակցության խորհուրդը տարածաշրջանային կազմակերպություն է, որը ներառում է վեց երկիր՝ Բահրեյն, Կատար, Քուվեյթ, ԱՄԷ, Օման և Սաուդյան Արաբիա: Կազմակերպության նպատակն է ընդլայնել անդամ երկրների միջև համագործակցությունը բոլոր ոլորտներում և մշակել ընդհանուր դիրքորոշումներ միջազգային և տարածաշրջանային կարևոր հարցերի վերաբերյալ:
