«Հայաստանն այսօր գտնվում է ճգնաժամային պայամաններում»,- այսօր տեղի ունեցած մամուլի ասուլիսի ժամանակ նման տեսակետ հայտնեց Հայաստանի կոմունիստական կուսակցության նախագահ Ռուբեն Թովմասյանը:
Անդրադառնալով քաղաքական կյանքին`նա ՀԱԿ հապավումը բացեց որպես «հայ ազգային կատակերգություն» և ավելացրեց․«Ով ասես և ինչ ասես անում են` առանց հաշվի առնելու ընտրողի կարծիքը: Քաղաքական այսպիսի վիճակում ընտրություններն անկասկած կեղծվելու են: Միաժամանակ, երկրի ապագան փոխելու համար պետք է փոխել այս իշխանություններին: Ոչ արտահերթ, սակայն ժողովրդավարական ընտրություններ անցկացնել»:
Թովմասյանը տեղեկացրեց, որ մասնակցելու է առաջիկա ընտրություններին: «Մենք անպայման կհայտնվենք խորհրդարանում: ․․․ Ոչ ոք չի կարող արգելել Ռոբերտ Քոչարյանի` իշխանության գալուն, իսկ ղարաբաղյան հարցը քաղաքական թնջուկ է մնալու»,- վստահություն հայտնեց Թովմասյանը:
«Որևիցե մեկը չի կարող հաշվի չնստել Ղարաբաղի հետ, բայց թե երբ կնստեն, հարց է: Միջազգային հանրությունը պետք է ինչ-որ ձևով ցույց տա, որ ազդեցություն ունի խնդրի կարգավորման վրա, ինչպես դա արեց Կոսովոյի պարագայում»,- ասաց Թովմասյանը:
