News Georgia-ի փոխանցմամբ՝ ՆԱՏՕ-ի գլխավոր քարտուղար Անդերս Ֆոգ Ռասմուսենը Բրյուսելում պատասխանել է վրացական «Իմեդի» հեռուստաընկերության հարցերին՝ անդրադառնալով ՆԱՏՕ-ի ու Վրաստանի համագործակցությանը.
«Մենք մեծապես կարևորում ենք Վրաստանի հետ համագործակցությունն ու գործընկերությունը և Աֆղանստանի օպերացիաներին Վրաստանի մասնակցությունը։ Մենք շատ ենք գնահատում Վրաստանի հետ հարաբերությունները։ Այս տարվա նոյեմբերին Հյուսիսատլանտյան խորհուրդը լրիվ կազմով կայցելի Վրաստան։
Մենք հնարավորություն կունենանք հանդիպելու Վրաստանի քաղաքական ղեկավարության հետ։ Մենք անհամբերությամբ ենք սպասում այդ այցին։ Վրաստանն Աֆղանստանում տարվող խաղաղարար օպերացիաների ամենաակտիվ մասնակիցներից մեկն է»։
Հիշեցնենք, որ Վրաստանն Աֆղանստանում գործող Միջազգային անվտանգության աջակցության ուժերի (ISAF) գործողություններում ներգրավվել է 2009 թվականից։ Ներկայումս այնտեղ են գտնվում 925 վրացի խաղաղապահներ։ Վերջիններիս դասակը (175 զինվոր ու սպա) տեղակայված է Քաբուլ քաղաքում՝ Ֆրանսիայի պատասխանատվության գոտում, իսկ գումարտակը (749 մարդ)՝ Հիլմենդ նահանգում՝ ԱՄՆ պատասխանատվության գոտում։
2012 թվականին Աֆղանստանում գտնվող վրացի զինծառայողների թվաքանակը հասնելու է 1500-ի, որով և Վրաստանը պետք է դառնա ՆԱՏՕ-ի անդամ չհանդիսացող երկրներից Աֆղանստանում ամենամեծ զինվորական կոնտինգենտն ունեցող երկիրը։ Սեպտեմբերի սկզբին Աֆղանստանում զոհվել է 10-րդ վրացի զինծառայողը։ Ընդհանուր առմամբ, Աֆղանստանում վիրավորվել է ավելի քան 20 վրացի զինծառայող։
