Համաշխարհային բանկը 1.5 մլն դոլարի չափով վարկ է տրամադրելու ՀՀ կառավարությանը՝ բարձրագույն կրթության ինովացիոն հիմնադրամ ստեղծելու նպատակով: Հիմնադրամի հիմնական խնդիրը համալսարանների համար դրամաշնորհային ֆինանսավորման աղբյուրներ ապահովելն է:
ՀԲ փորձագետ Սեզար Ջամալն «Առաջին լրատվականի» հետ զրույցում հայտնեց, որ հիմնադրամը կբացվի 2012 թ. հունվարին, իսկ առաջին դրամաշնորհային մրցույթի հայտարարությունը կլինի մարտ-ապրիլին: Առանձին դիմող համալսարանի համար դրամաշնորհի չափը կլինի 150-300 հզ. դոլար, միաժամանակ համալսարանը մինչև 10% գումար պետք է ներդնի, իսկ համատեղ ծրագրերի համար, որոնց մի քանի ԲՈՒՀ կմասնակցի, 500-700 հզ. դոլար: Ս.Ջամալը նշեց, որ 1.5 մլն դոլարը հատկացվում է հիմնադրամի ծրագրերի առաջին փուլի համար, իսկ երկարաժամկետ ծրագրերի համար փնտրում են ֆինանսավորման աղբյուրներ:
ԲՈՒՀ-երը պետք է կազմեն առաջարկներ և ներկայացնեն հիմնադրամին, լավագույն առաջարկները, որոնք կվերաբերեն կրթության որակի բարձրացմանը, նորարարությունների ներդրմանը, ուսանողների ներգրավվածությանը, կստանան ֆինանսավորում:
«Ե՛վ մասնավոր, և՛ պետական համալսարանները իրավունք կունենան դիմել հիմնադրամին: Լավագույն առաջարկները կընտրվեն մրցութային կարգով: Այժմ աշխատում ենք ֆինանսավորման մեխանիզմների վրա: Մեր նպատակն է ինտեգրել կրթությունը, գիտահետազոտական աշխատանքները և աշխատաշուկան, տրամադրել ֆինանսավորում, որպեսզի նրանք իրականացնեն իրենց որակի բարձրացում`ուսումնական մեթոդների, դասավանդման, կրթական ծրագրերի, նոր դասախոսներ հրավիրեն համալսարան»,- ասաց Ս.Ջամալը:
ՀՀ էկոնոմիկայի փոխնախարար Վահե Դանիելյանի կարծիքով՝ կարևոր է ոչ թե առանձին գիտական ծրագրերի ֆինանսավորումը, այլ միջավայրի ստեղծման ֆինանսավորումը: Նրա խոսքով՝ պետք է լինի խորհրդատվական խումբ, որը կհուշի, թե ինչ ուղղությամբ ծրագրեր իրականացվեն. «Այսօր որակյալ ծրագրերի և որակյալ միջավայրի անհրաժեշտություն կա»:
